Hellt úr auglýsingaskálunum í Nevada

Hér má sjá þrjár nokkuð sterkar auglýsingar frá Barack Obama sem sýndar eru núna í Nevada þar sem forval fer fram á morgun.

Mér finnst þessar auglýsingar nokkuð góðar en slagurinn er harður og föst skot hafa gengið á milli Clinton og Obama undanfarið þar sem Hillary hefur nokkuð ákveðið notað Bill í sinni baráttu.

Nokkuð ljóst að þau draga streklega fram það sem skilur þau að. Hillary notar reynslu sína sem agn en Barack einbeitir sér að því að sýna fram á að hann geti breytt hlutunum. (og hér verður að koma hlekkur á eina "semi" auglýsingu frá Clinton)

Annars hefa orðið mjög miklar breytingar á fylgi þeirra í skoðanakönnunum síðasta mánuðinn sérstaklega þar sem Obama hefur sótt verulega á. Skemmtilegt að skoða það nánar þar sem kannanirnar eru greindar nokkuð vel niður eftir hinum ýmsu þáttum. Skoðanakannaumræðan hefur snúist dálítið um að þær séu ómarktækar þar sem þær eru gerðar á landsvísu og þar með hafi þær ekkert forspárgildi um einstök ríki en aðrir segja þær hafa mjög mikið að segja fyrir kosningarnar 5. febrúar því að þann dag kjósi ein 22 ríki og þá sé nánast um að ræða kosningu á landsvísu.

Verst er að ég kemst varla yfir að innbyrða allar þær upplýsingar sem ég næ í varðandi þetta. Þetta er því alvöru grúsk að mínu skapi.

Það held ég.

ps. Spái því að Obama vinni með nokkrum prósentum á morgun og Clinton verði frekar svekkt með niðurstöðu sína því hún verði verulega undir væntingum og Edwards verði sterkari einnig en margir eiga von á. (Þetta gæti líka litið illa út á sunnudag eins og þetta með Thompson hjá mér á miðvikudaginn).

Er þetta ekki að nálgast þjóðarmorð?

Það fer nú að nálgast það að hægt sé að kalla aðgerðir Ísraelsríkis gagnvart Palestínumönnum þjóðarmorð þó vissulega sé það sterkt. En í raun er það ekkert annað. Ísrael hefur allt í hendi sér gagnvart þeim, allar aðflutningsæðar á nauðsynjum og þegar skorið er svona á þær bíður ekkert annað en hungurmorð heilli þjóð Palestínu. Og þetta er gert algjörlega í skjóli Bandaríkjanna.

Svona lagað á ekki að líðast og alþjóðasamfélagið á að ganga inn í þessi mál og stöðva þennan gjörning og leysa síðan málið.

Ef það verður ekki gert koma skyldir aðilar Palestínumönnum til hjálpar og allsherjar styrjöld brýst út og hver veit hversu víðtækt það verður. Það verður ekki horft uppá þetta lengur.

Nú er nóg komið.

Aðgerðir Ísraela gagnrýndar

Ég skynja afsögn

Ég held að ráðningarmálið hans Árna Matt. endi með því að karl greyið þurfi að segja af sér ráðherraembættinu. Þeir þrír sem voru hæfari í starfið fara í mál við hann og ábyrgðin á ráðningunni er nú ráðherrans og það ferli endar síðan á afsögn.

Plottið er síðan auðvitað runnið undan rifjum nafna hans Johnsen og er þá fyrsta sætinu í kjördæminu fullhefnt er það ekki?

Ég veit það ekki.

Repúblikar í Michigan

Örstutt spá fyrir nóttina, ætli maður líti þá ekki frekar illa út í fyrramálið.

Ég held að Fred Thompson komi þokkalega út í nótt og verði þriðji en Romney vinni með svona 3-5% fram yfir McCain.

Það held ég.

Hástökkvari vikunnar

Það var bísna merkilegt að horfa á fjármálaráðherrann í Kastljósinu áðan þar sem hann fékk frekar þægilega meðhöndlun rólegs spyrils. Upp úr stóð hvernig ráðherranum tókst að sjá stórvægileg mistök hæfnisnefndarinnar í dómaramálinu og sigla framhjá þeim með samvisku sína nær eina að vopni.

Það var jú hæfnisnefndin eins og hún lagði sig sem gerði mistök í málinu, það er hæfnisnefndin sem ber ábyrgð á neikvæðri umræðu um embættisveitingu ráðherrans í samfélaginu, það er hæfnisnefndin sem gerði fleiri mistök en að meta ekki ráðherraaðstoðarmannsstarfið rétt í samhengi við héraðsdómarastarfið og það er auðvitað hæfnisnefndin sem kann ekki lagalegt verksvið sitt. En Árna tókst að bægja hættunni frá en situr í staðinn uppi með þessa líka leiðinlegu þjóðfélagsumræður sem er nefndinni um að kenna.

En fyrir utan þetta var viðtalið leiðinlegt, ráðherrann virtist vera illa undirbúinn og illa fyrirkallður og spyrillinnn eins og köttur í kringum heitan graut þar sem vantaði alla beinskeitni í viðleitni við að fá svörin.

En ég spyr að lokum, hvað er það í starfi aðstoðarmanns ráðherra sem gerir það að verkum að viðkomandi aðili hoppar upp um tvo hæfnisflokka og fram fyrir þá tvo aðila sem þar voru fyrir. Væri ekki ráð að einhver málsmetandi og heiðarlegur rannsóknarblaðamaður myndi skoða það alveg niður í kjölinn, svona til að fá það á hreint uppá framtíðarráðningar í stjórnkerfinu að ræða. Mér finnst það vera nauðsynlegri blaðamennska en að finna reykherbergið í Leifsstöð.

Grúsk ársins

Ég sé það liggja ljóst fyrir mér að grúsk ársins hjá mér verður í sambandi við komandi forsetakosningar í Bandaríkjunum. Ég finn nóg af upplýsingum um forval flokkanna tveggja sem nú er komið á fullt skrið á netinu þar sem hægt er að sjá marga vinkla. Persónulega finnst mér verulega áhugavert að sjá þetta gagnvirka kerfi sem bloggið er og hvernig það er að breyta fréttamennsku að því að mér finnst. Það sem maður staldrar við þar eru "kommentin" sem sett eru inn við fréttir eða greinar en á þeim finnst manni maður geta einhvernveginn lesið meira út hvernig landið liggur almennt en hægt er í mjög knöppum og sterílum fréttum annars.

En það sem mér finnst standa upp úr núna er að menn eru samir við sig í Bandaríkjunum og eru auðvitað búnir að finna samsæri í forvali demókrata í New Hampsire á þriðju/miðvikudaginn var. En það snýst um það í stuttu máli að sjálfvirkar talningavélar haldi með Hilary R. Clinton en þar sem atkvæðaseðlarnir eru taldir í höndum fólks sé Barak H. Obama jöfnum fótum við andstæðing sinn. Kemur ekki á óvart að eitthvað svona skjóti upp kollinum og á örugglega eftir að koma meira í sama dúr.

Eftirköst New Hampsire forvalsins eru hins vega spennandi á þann veg að mikill tími og orka fór í það fyrstu dagana að velta fyrir sér af hverju svona mikill munur var á útkomunni og spánum fyrir fram. Ég sem tölfræðifíkill hef sökkt mér niður í það og fundist áhugavert. Fjalla kannski um það seinna.

Síðan fóru menn þó að fjarlægjast þann sjónarhól og baráttan á milli Clinton og Obama fór í nýjar hæðir með frekar sterkum skotum úr búðum Clinton eins og sjá má hér og hér. Einhvernveginn sá maður það fyrir sér að kynþáttaumræður myndu skjóta upp kollinum í þessu.

En venjið ykkur við að ég skjóti hér inn nokkrum pistlum um þetta efni á árinu.

Það held ég.

Árið gert upp

Þegar maður kemur nú til baka úr sjálfskipuðu "óvart" fríi frá skrifum hér á síðu er við hæfi að óska öllum gleðilegs árs og farsældar á því sem er að byrja. Ég tel mig ekki vera hælbít og vil því að öllum vegni eins vel og hugsast getur burt séð frá stöðu eða lífssýn.

Skin og skúrir skiptust voru til skiptis á liðnu ári svo sem eins og vænta má því ekki eru allar ferðir til fjár eins og þekkt er. Fyrstu fjórir mánuðirnir fóru í fæðingarorlof og mikla umsjón og samvistir við Eyhildi. Gleði tími og algjörlega ómissandi, hefði ekki viljað skipta á honum og nokkru öðru held ég og samverustundir fjölskyldunnar í raun það sem upp úr stóð á árinu, þar með talin Færeyjaferð í lok apríl. Þá fékk ég einnig góðar kveðjur frá gömlum skólafélaga sem ég hafði hvorki heyrt né séð lengi og var það ákaflega ánægjulegt.

Heilsan á okkur var alveg ágæt í heildina séð þó nokkrar umgangspestir drægju okkur niður í einhverja daga á árinu. Það varð þá einnig ljóst á árinu (það sem ég vissi reyndar á því þar síðasta) að ég kem ekki til með að ná bata á handleggnum mínum og skaðinn þar því varanlegur. Heppinn hvað ég get þó gert og tekið þeim afleiðingum með nokkrum ágætum án þess að bitni á nærstöddum um of.

Pólitíkin var skrykkjótt svo ekki sé meira sagt. Ég fékk ekki brautargengi persónulega þar sem ég sóttist eftir því og hálfgert afhroð beið okkar á landsvísu, sýnu mest á höfuðborgarsvæðinu. Ég er þó ekki þannig farinn að hafa farið í burtu í fússi eins og margur annar gerir nú á dögum heldur tvíeflist í vinnu minni fyrir það sem ég trúi á og held áfram inn í framtíðina með það að vopni.

Námið mitt gengur ágætlega og sækist eins og við er að búast miðað við að maður reynir að stunda fulla vinnu um leið þannig að maður er að ljúka 5 einingum á önn.

Það sem ég sé eftir á árinu sem leið er að ég hef ekki náð að lesa eins margar bækur og ég hefði viljað. Ég hef eiginlega byrjað á mörgum og klárað fáar sem mér finnst frekar skítt. Þar að auki hef ég ekki gefið mér neinn tíma svo heita megi í grúsk af neinu tagi og það er afleitt. Er þó byrjaður að reyna bót í þessum efnum og er kominn vel á veg með tvær nýjar bækur auk þess sem ég er búinn að sökkva mér niður í aðdraganda forsetakosninga í Bandaríkjunum. Þar er netið góður bakhjarl því ekki er hún nú upp á marga fiska fréttamennskan af því í íslenskum fjölmiðlum.

Og svo smá ádeila í lokin. Mér finnst afleitt að það séu komin auglýsingahlé inn í miðja dagskrárliði hjá RÚV, hvort sem um er að ræða áramótaskaup eða annað. Ég er ekki endilega á því að það eigi að hætta með auglýsingar þar, bara ekki rjúfa þætti fyrir þær. Það verður að vera einn miðill sem gerir það ekki.

Áramótaskaupið var síðan hið besta í mörg herrans ár eða alllar götur síðan Áslaug var drepin í kjölfar "Þjóð í hlekkjum hugarfarsins" þáttarins hans Baldurs Hermannssonar níutíu og eitthvað.

Það held ég.

Sé ekki....

... að 500 manna úrtak segi mikið til um þýði sem telur eitthvað yfir 20 milljónir.

Drykkjusiðir hafa áhrif á vinnuframlag

Gera konur ekkert fyrir knattspyrnuna?

Það vekur athygli mína að við afhendingu gull- og silfurmerkja KSÍ í gærkvöldi skuli einungis fjórar konur fá afhent merki af annarri hvorri gráðunni, reyndar einni þeirra fjögurra gullmerki. Alls úthlutaði KSÍ 24 gullmerkjum og 53 silfurmerkjum.

Getur það verið að konur séu nánast ekkert að vinna að framgangi knattspyrnunnar á Íslandi eða er framlag þeirra ekki metið að verðleikum hjá þeim sem úthluta þessum viðurkenningum sem felast í merkjaafhendingunni?

Vitanlega er svona lagað alltaf vandmeðfarið og álitamál um hin og þessi nöfn geta komið upp (og gera það reyndar alltaf) en er þessi skipting ekki aðeins skökk?

Ég held það.

Skotheld vitleysa

Ég hef bara engan húmor fyrir þessu athæfi og ennþá síður er ég upprifinn yfir allri athyglinni sem þetta mál fær. Mér finnst margt annað vera verulega meira áhugavert að fjalla um á besta tíma í fjölmiðlum landsins.

En það er bara ég sjálfsagt.

Skagapiltur pantaði viðtal við Bush