Vatnajökulsþjóðgarður

Verkefnið um stofnun Vatnajökulsþjóðgarð er gríðarlega metnaðarfullt að mínu mati. Þar er verið að taka heildstætt á stóru landsvæði með markmið varðveislu í huga. Það hlýtur því að vera ljóst að allar ákvarðanir um vegi á svæðinu, gerð þeirra þar á meðal, verður að falla að heildarmynd þjóðgarðsins. Ég trúi ekki öðru en að svo verði gert og á þann hátt unnið eftir þeirri sýn, sem þjóðgarðurinn grundvallast á.

Vatnajökulsþjóðgarður verður síðan að standa undir nafni þegar á fót er kominn og því verða menn að gera sér grein fyrir því strax í byrjun að til að gera þetta almennilega þarf að vera til staðar fjármagn. Það kostar nefnilega alveg helling að halda þessu batteríi gangandi þegar þetta verður að veruleika.

í Framhaldi þess er ekki úr vegi að menn fari að velta fyrir sér í alvörunni hvort hluta þess fjármagns eigi að afla með gjaldtöku af ferðamönnum og þá hvernig skuli staðið að henni. Það á einnig við um aðra ferðamannastaði á landinu.

Vegir raski ekki landslagi í Vatnajökulsþjóðgarði

Mikið að gerast útaf engu

Alveg bráðsniðugir leikmennirnir hjá Arsenal og Chelsea í dag. Vaða beint í hópslagsmál útaf engu þannig séð. Svo kom Kolo Toure í viðtal hjá SKY eftir leik og sagðist ekki skilja af hverju hann hefði fengið rautt og þaðan af síður af hverju Adebayor fékk að sjá sama litinn. Ekki var það lítill og þröngur völlur í þetta skiptið sem ollu brottrekstrunum var það nokkuð?

En svo er auðvitað seinasta hálmstráið að segja að dómarinn hafi verið allt of lengi að vísa þeim útaf. En ég meina, hann þurfti nú að skilja allt liðið í sundur fyrst.

Wenger: Við misstum stjórn á okkur

Já er það?

Bíðið nú aðeins við, var hún sem sagt ekki í Samfylkingunni. Ég verð að játa að ég var eiginlega viss um það, hélt hún væri búin að sitja á framboðslista hjá Sf. og allt saman. Voðalega er veröldin skrýtin stundum.

Björk Vilhelmsdóttir gengin í Samfylkinguna

Ég veit það ekki

Þetta er allt á þeim nótum sem maður bjóst við svo sem. Það vantar auðvitað dálítið í þetta útfærslur á hverju fyrir sig og kannski frekari rökstuðningi. Þetta er heilt yfir séð frekar vinstri sinnað eða sósíalískt. Menn þurfa að svara svolítið betur varðandi skattamálin og gjaldtöku í því sambandi. Þetta fellur mönnum líklega vel í geð sem vilja fara til baka í "stjórnunarsamfélag" svo maður segi nú ekki meira.

VG vill veita Jafnréttisstofu auknar heimildir til eftirlits með fyrirtækjum

Lagst í ferðalög

Jæja, þá er loksins komið að því. Allt síðan snemma í ágúst á síðasta ári höfum við hjónin verið að spá í hvert við ættum eiginlega að fara í svona alvöru brúðkaupsferð. Slík ferð var síðan endanlega ákveðin í dag þannig að í vissum skilningi er um stórdag að ræða. Eftir miklar pælingar, bæði fjárhagslegar sem og áhugasviðslegar, ef þannig mætti orða það, höfum við komist að þeirri niðurstöðu að bregða okkur til Færeyja í eins og tvær vikur í vor eða snemmsumars. Aðalkeppnin við þessa ferð var að fá frá ákaflega spennandi ferð til Rússlands, reyndar þriggja ferða til Rússlands sem í boði eru þangað í sumar á vegum ákveðinnar ferðaskrifstofu. Það sem réð mestu um endanlega ákvörðun er að við tökum stelpurnar með okkur til Færeyja en það hefðum við ekki gert í ferð til Rússlands. Að auki fengum við staðfest í dag að við fáum gistingu hjá ættingjum Anitu og þá var fjárhagslegar aðstæður mun hagstæðari Færeyjaferðinni. Við munum síðan auðvitað sigla með Norrænu frá Seyðisfirði en eftir er að kanna bókunarstöðu á þeim bænum.

Maður fer bara seinna til Rússlands.

Farinn

 Í sjálfu sér kemur þetta mér ekki mikið á óvart. Jakob virðist mér alltaf hafa haft meiri metnað en gengi hans í Samfylkingunni hefur boðið honum uppá og því kannski fullreynt fyrir hann á þeim bænum og þess vegna fari hann fram með öðrum þegar það er í boði. Ég sé ekki endilega mikla áherslubreytingu hjá honum nema þá að Samfylkingin sé að breytast yfir til vinstri og því verði þeir að víkja sem í sönnu telja sig vera hina svokölluðu hægri krata. Ef svo er gefur þetta manni til kynna ákveðna stefnubreytingu Samfylkingarinnar í vinstri átt og þá sýnist mér að grundvöllur hins stóra jafnaðarmannaflokks Íslands svolítið veikari en fyrr.

Svona þegar upp er staðið þá hafa bísna margir verið á ferðinni til og frá flokkum í aðdraganda kosninganna nú í vor. Einhvernveginn finnst mér það vera með meira móti og dreifðara heldur en áður hefur sést. Þarf að kanna það betur áður en hægt er að alhæfa um það.

Er þetta kannski aðdragandinn að stórbreytingum á ísleska flokkakerfinu, sem tekur næstu fjögur til átta árin að taka á sig endanlega mynd og festa sig í sessi? Stór spurning og líklega hugarburður, en samt gaman að spá í það finnst mér. Nýr vinkill á hlutina en líklegast er þetta ekkert flóknara en um sé að ræða einstakling að nýta sér opið tækifæri.

 

Jakob Frímann genginn úr Samfylkingunni

Kemur á óvart

Það var þá pláss fyrir konu eftir allt saman hjá Frjálslyndum. Ánægjulegt að sjá það en þær hefðu mátt vera fleiri í forystusveit flokksins. Þarna virðist mér vera á ferðinni mjög frambærilegur kandidat til góðra verka. Allar götur sýnist mér hún hafa þekkingu á málaflokki sem þarfnast þess með að talað sé fyrir. Gott mál segi ég og meina.

En kerfið virðist vera svolítið óhefðbundið hvað varðar það hvernig hlutirnir berast frá Frjálslyndum varðandi þessi mál. Þetta fer út "samkvæmt upplýsingum frá Sigurjóni Þórðarsyni". Virkar frekar undarlegt á mig, veit ekki um aðra.

Kolbrún leiðir F-lista í Suðvesturkjördæmi

Staðan í dag eða??

Skoðanakönnunin byggir á svörum um það bil 440 einstaklinga. Hvað ætli það hafi verið margir sem fengu tvær hringingar af þessum 440, samanber þessi færsla, og gátu leikið sér aðeins með svörin sín? Þessar kannanir gefa svo sem einhverja mynd af stöðunni eins og hún er en skekkjumörkin eru svo mikil að það er hreinlega ekkert vit í því í rauninni að vera að draga einhverjar stórar ályktanir í framhaldi þeirra. Ætli það sé ekki meira að marka "skoðanakönnunina" hans Þráins Bertelssonar í sem hann birti í bakþönkum fréttablaðsins fyrir ekki svo löngu síðan og var byggð á mjöðminni hans.

Ef við reynum nú samt að meta stöðuna aðeins þá er Sjálfstæðisflokkurinn stöðugur í fylgi sínu. Samfylkingin fellur nokkuð. Vinstri grænir bæta mikið við sig. Framsóknarflokkur tapar helling og Frjálslyndir í kringum sitt venjulega fylgi. Allt þetta auðvitað út frá kjörfylgi. Sveiflan virðist þá vera til Vinstri grænna frá Samfylkingu og Framsókn og á þann hátt að um er að ræða alveg jafn slæma útkomu fyrir hvorn þann flokk fyrir sig. Þeir óákveðnu og þeir sem neita að svara hafa þó mest að segja þegar upp er staðið.

En eins og áður sagði er ekki mikið hægt að stóla á þetta finnst manni.

Fylgi VG og Samfylkingar mælist álíka mikið í nýrri könnun

Til móður minnar

Ég ákvað að setja þetta hér inn fyrir þá sem hafa áhuga á og vilja lesa. Ég skrifaði þetta til móður minnar fyrir nokkrum misserum síðan þegar ég var að velta fyrir mér mikilvægi margra, sem berast ekki á og vinna þögult en umfram allt mikilvægt og farsælt starf. Hún á þetta skilið og miklu meira til.

Skrár tengdar þessari bloggfærslu:

• Til móður minnar

Vel af sér vikið

Ætli það geti verið að eitthvað sé hægt að læra af frændum okkar Færeyingum í þessum málum? Mér finnst þetta vera athyglisverður árangur, ef hægt er að orða það svo. Það virðist frekar vera um að ræða aukingu í þessum efnum í heiminum. Kannski skilar það einhverju til fækkunar fanga hér á landi sáttaumleitunarferlið, sem fór af stað í fyrra að mig minnir. Þá er einng vert að huga að orðum Þórarins Tyrfingssonar varðandi meðhöndlun fíkniefnamála hér á landi.

Færeyingar haga sér manna best