Obama vinnur prófkjörið í Mississippi

Það fór eins og maður átti von á að Obama vinnur prófkjörið í Mississippi. Þegar kjörstöðum var lokað var hann strax lýstur sigurvegari í fréttamiðlum vestan hafs og líklega verður sigurinn eitthvað í kringum 20% hjá honum.

Þessi sigur ætti að gefa honum í kringum 20 kjörmenn og Clinton þá rúmlega 10 en í raun breytir það ekki svo ýkja miklu því frambjóðendurnir eru strax farnir að líta til Pennsylvaniu þar sem kosið verður í apríl eða eftir um það bil sex vikur. Þar hefur Clinton gott forskot samkvæmt skoðanakönnunum en það á líklega eitthvað eftir að breytast fram að kjördegi.

Svo er auðvitað mjög líklegt að einhver hreyfing komist á málefni Florida og Michigan þessar vikur sem frí er frá prófkjörunum.

Uppfært, Úrslit :

Obama 61% atkvæða - 21 kjörmaður

Clinton 37% atkvæða - 12 kjörmenn

Prófkjör í Mississippi og kjörmannahugleiðingar

Það er enn eitt prófkjörið í dag en nú er það Mississippi sem er undir með eina 33 kjörmenn í boði hjá Demókrötum. Það eru ákaflega góðar líkur á því að Obama vinni frekar stórt í dag þar sem hann á góðan stuðning vísan hjá svörtum kjósendum og þeir verða líklega um 50% þátttakenda í prófkjörinu í dag. Obama sigraði síðan í Wyoming á laugardaginn, frekar stórt meira að segja eða nærri því 60-40. Það góða sem Clinton tók útúr því var tiltölulega jöfn skipting kjörmanna eða 7-5 Obama í vil.

Annars er það athyglisvert að samkvæmt RCP að í prófkjörunum í Texas, Ohio, Rhode Island og Vermont í síðustu viku náði Clinton 10 fleiri kjörmönnum en Obama. Það voru nú ekki fleiri sem hún náði og á dögunum fram að forvalinu í Wyoming náði Obama þeim til baka í sjálfkjörnu kjörmönnunum.

En aðeins að kjörmannafjölda hvors frambjóðanda. Obama er með 1589 en Clinton 1470 fyrir prófkjörið í dag samkvæmt RCP. Obama þarf því 436 kjörmenn til viðbótar til að hljóta útnefningu flokksins en Clinton 555 en mér telst til að 599 kjörmenn séu í boði í þeim prófkjörum sem eftir eru (og síðan þeir sjálfkjörnu sem ekki hafa stutt annað hvort þeirra opinberlega fram að þessu). Þetta þýðir að eigi Obama að hljóta útnefninguna þarf hann að fá um 73% þeirra kjörmanna sem eftir eru en Clinton um 93% þeirra. Það er auðvelt að sjá að þetta getur hvorugt þeirra afrekað. Auðvitað skekkir það myndina aðeins að það eru alltaf að detta inn hjá öðru hvoru þeirra stuðningur sjálfkjörnu fulltrúanna og þar með lækkar hlutfallið sem hvort þeirra þarf af kjörmönnum sem í boði eru í prófkjörunum.

Og síðan eru það Flórida og Michigan. Það eru flestir orðnir heitir fyrir því að kjósa hreinlega aftur í þessum ríkjum, vandamálið er að enginn vill borga fyrir það. Það nýjasta í þeim efnum er að hafa póstkosningu, sem í sjálfu sér gæti alveg virkað held ég.

En þar með eru komnir fleiri kjörmenn í spilið eða 366 (eitthvað um það bil) í viðbót og þar með lækkar hlutfallið sem Obama eða Clinton þurfa af kjörmönnum í boði. Mér sýnist að það hjálpi Obama meira en Clinton þó svo að Clinton sé líklega sterkari í báðum þessum ríkjum heldur en Obama. Ég held meira að segja að það muni koma til með að færa honum útnefninguna, verði kosið aftur í þessum tveimur ríkjum með upprunalegan kjörmannafjölda í boði. Með þær kosningareglur sem í gangi eru fær Obama nefnilega alltaf góðan skerf af kjörmönnum þó svo að hann tapi prófkjörunum.

En við skulum sjá til.

Heilsa og stjórnmálamenn

Í kosningabaráttunni í Bandaríkjunum birta forsetaframbjóðendur sjúkraskýrslur sínar og þar er einnig skrifað um heilsu þeirra.

Þetta má ekki hér á landi hefur manni virst undanfarna mánuði.

Kosið aftur

Núna í morgun var samþykkt tillaga oddvita Þingeyjarsveitar að kjósa um sameiningu Þingeyjarsveitar og Aðaldælahrepps þann 10. maí í vor.

Sveitarstjórn Þingeyjarsveitar leggur til að skipuð verði samstarfsnefnd um sameiningu Aðaldælahrepps og Þingeyjarsveitar með það að markmiði að sveitarfélögin verði sameinuð.

Kosið verði um sameinigu eigi síðar en 10. maí 2008. 

Samstarfsnefndin verði skipuð 6 fulltrúum, þremur frá hvoru sveitarfélagi

Ég veit að þetta er lending aðila í málinu eða með öðrum orðum leið til sátta svo ekki verði hatrammar deilur innan sveitar í framhaldinu. Þá veit ég einnig að oddviti sveitarstjórnar hefur lagt mikið af mörkum til að ná fram þeim sáttum sem eiga að birtast í þessari samþykkt.

Vandamálið er að ekki er einhugur innan sveitarstjórnar um þetta samt sem áður þar sem einn fulltrúinn sat hjá við afgreiðslu málsins og það þykir mér ekki benda til þess að sá aðili munni í framhaldinu vinna mikið að því að ná fram heilum sáttum.

Hitt er svo annað að stjórnendur Þingeyjarsveitar hafa fengið vilyrði frá samgönguráðherra um fjárframlag vegna fyrirhugaðrar sameingingar.

Oddviti og varaoddviti gengu á fund ráðherra sveitarstjórnarmála, Kristjáns Möller, þann 5. mars.  Fram kom hjá ráðherra að við sameiningu sveitarfélaganna tveggja liggi fyrir að þau fái  41 milljón króna sem einkum er ætlað til endurskipulagningar þjónustu og stjórnsýslu í nýju sveitarfélagi

Afrek að ná einhverjum föstum vilyrðum frá KLM.

Bensínverðið og það sem gleymdist að segja

Fréttin í kvöldfréttum sjónvarpsins á föstudagskvöldið um hækkun bensínverðs undanfarnar vikur var ágæt svo langt sem hún náði. Einblínt var á beinan kostnaðarauka hvers bíls miðað við einhvern meðalakstur á ári en það er kannski þessi beini kostnaðarauki sem hver og einn getur a.m.k. reynt að tækla með því að skera niður akstur.

Það sem mér fannst aftur á móti vanta inn í fréttaflutninginn var umfjöllun um hvernig óbeinu áhrif bensínverðshækkunar ræðst á okkur aftanfrá í gegnum hækkun vísitölunnar og þar með verðbólgunnar, sem svo auðvitað hækkar afborganir lána hjá manni. Við því á maður síðan engin svör eins og maður á þó smá glætu á að skera aksturinn niður og minnka notkunina.

Hitt er agalegt og á þeim forsendum ætti ríkisvaldið kannski að athuga skattlagninguna á eldsneytinu því ljóst er að það á bara eftir að hækka.

Svo ætti auðvitað að fara í einhverjar aðgerðir varðandi skattalega stýringu yfir í neyslugrennri bifreiðar. Það er annað mál.

Tónninn í kosningabaráttu Repúblikana í haust

Nú þegar ljóst er hver verður forsetaframbjóðandi Repúblikana í haust fara menn í auknum mæli að skoða hvernig þeir komi til með að haga kosningabaráttu sinni í haust. Núna rétt um daginn birtist á Eyjunni frétt um tilraunahóp fólks þar sem Repúblikanar voru að kanna hvað væri hægt að ganga langt gagnvart konu eða blökkumanni sem frambjóðanda áður en það snérist upp í andhverfu sína, þ.e. fældi frá kjósendur.

Næsta skref er auðvitað að finna í netheimum þar sem þeir hafa verið iðnir við að skrá vefföng sem tengjast á beinan hátt annað hvort Hilary Clinton eða Barack Obama og þá yfirleitt á neikvæðari nótunum. Sýnist reyndar að það sé taktík Repúblikana að vera á neikvæðu nótunum, spurningin bara hversu neikvæðum.

Um er að ræða hátt í fimmtíu vefföng og hér eru nokkur dæmi um þau.

clintoniswrong.com, canttrustclinton.com, hopelesshillary.com, hillarytruthsquad.com, hillarymythfact.com, amateurobama.com, barackisliberal.com, nowecannot.com, barackthebeginner.com, yeswecanwhat.com, nowecannot.com, meetbarackobama.com.

Þetta síðasta finnst mér svolítið athyglisvert, sker sig svolítið úr og ég myndi alveg veðja á að það gæti valdið misskilningi og verið nothæft í illa gerðum kosningaslag.

Repúblikanar hafa auðvitað um leið hugsað fyrir svipuðum gagnárásum og skráð vefföng í svipuðum dúr sem tengjast John McCain svo Demókratarnir geti ekki gert eins og þeir. Það bara virðist ekki vera uppi á borðinu hjá þeim, alla vega hafa þeir ekki sýnt neina takta í þá átt, einungis verið að sýsla með vefföng sem eru þeim praktísk varðandi sitt innra starf.

Það eru margar birtingarmyndir á lýðræðinu.

Vandræðin í klósettpappírssölunni

Nú er sölu- og söfnunartíminn genginn í garð og þá geta söluaðilar lent í ýmsum vandræðum, sérstaklega þegar þeir lenda á stjórnmálaáhugafólki.

Sjálfstæðismaðurinn kaupir ekki neitt nema að minnsta kosti fimm söluaðilar mæti á staðinn svo samkepnin sé örugglega í fyrirrúmi. Þá verður hann líka að vera öruggur um að hagnaðurinn renni til heils hóps fólks heldur verður hann að renna heill og óskiptur til þess einstaklings sem keypt er af honum til fullra hagsbóta.

Samfylkingarmaðurinn spáir verulega vel í málin og ákveður síðan að gera skoðanakönnun um hvort pappírinn sem boðinn er sé ekki örugglega vinsæll áður en af kaupum verður. Svo skemmir auðvitað alls ekki fyrir að geta gert upp í evrum og auðvitað verður framleiðslan að vera frá Evrópusambandinu.

Sá Vinstri-Græni kaupir ekkert því þetta er ekkert annað en kapitalisminn í sinni verstu mynd með arðráni þeirra sem framleiddu vöruna. Þar að auki er hann á móti klósettpappír og notar gras í staðinn (fjallagrös til hátíðabrigða þó það sé auðvitað alveg ómögulegt).

Framsóknarmaðurinn kaupir ekki nema söluaðilinn sé utan af landi og því lengra utan af landi því meira er keypt (ef það eru göng þangað er keypt tvöfalt). Þá er það næstum því nauðsynlegt að annað hvort mynd af sauðkindinni eða Guðna sé utan á umbúðunum sem auðvitað eru úr áli.

Sá Frjálslyndi fullvissar sig fyrst og fremst um að engir útlendingar hafi komið að hvorki framleiðslu- né söluferlinu. Svo er auðvitað algjörlega nauðsynlegt fyrir söluaðilann að geta fullvissað hann um að kvóti í nokkurri mynd sé algjörlega fyrir utan söluherferðina, hvorki hafi verið skipt niður á hverfi eða nokkrar hömlur settar á hvaða fjölda af pakkningum hver selur.

Sé söluaðilinn hins vegar á ferð í Þingeyjarsveit vandast málin auðvitað verulega ofan á það sem hér að undan er talið. Þá er auðvitað ekkert keypt á heimilinu nema að undangengnum fullum umræðum fjölskyldunnar, með skiptingu í meirihluta og minnnihluta sem, takið eftir, springur að minnsta kosti þrisvar í umræðunni. Þá verður auðvitað líka að safna undirskriftum í sveitarfélaginu um það hvort ekki verði að fara fram kosning um hvaða gerð eigi að kaupa.

Þetta ber aðallega að skoðast í ljósi glettninnar í tilefni dagsins.

Nú verður Obama grimmari í kosningabaráttu sinni

Í aðdraganda  prófkjöranna í gær var ljóst að Hilary Clinton þurfti að breyta sinni aðferðafræði á einhvern hátt og eins og ég fjallaði um í kjölfar margra sigra Obama þá var von hennar bundin við neikvæða kosningabaráttu. Það er mjór vegur að feta en svo virðist sem henni hafi tekist það með ágætum. Fáir vildu taka undir að hún hefði spilað "dirty" en það jaðraði við það á köflum samt. Helst var talað um að "3 am" auglýsingin hefði verið óhrein og rökin á bakvið það voru þau að menn þyrftu að spyrja sig að því hvort hinn flokkurinn gæti tekið auglýsingu beint og notað hana í sinni baráttu. Svarið við "3 am" auglýsingu Clinton var já hjá mörgum.

En svar Obama við þessu er að verða grimmari í sinni baráttu gegn Clinton á næstunni og láta hana svara í smáatriðum fyrir hvað hún stendur fyrir.

Annars voru þetta slæm úrslit fyrir Demókrataflokkinn úr því sem komið var og gerir ekkert annað en að leggja vopnin í hendur Repúblikana næstu vikurnar þegar þeir geta einbeitt sér að því að safna liði og skipuleggja sig.

Nú þurfa menn hreinlega að setjast niður og fá niðurstöðu sem fyrst. Það er ljóst að hvorugt þeirra nær tilætluðum kjörmannafjölda í þeim prófkjörum sem eftir eru (Obama næði því með því að vinna 98% þeirra kjörmanna í þeim prófkjörum sem eftir eru) og þá er alveg eins gott að sjálfkjörnu kjörmennirnir gangi bara frá þessu strax.

Stórsigur Clinton

Sigur Clinton í Ohio (ca. 12% munur) og í Texas (4%) er í raun stærri en við var búist og vel stærri en útgönguspár gáfu til kynna í gærkvöldi. Obama vinnur þó caucus kerfið í Texas og ennþá er hlutirnir nokkuð á huldu hvernig kjörmenn skiptast á milli þeirra í Texas.

Ljóst er að Clinton dregur nokkuð á Obama í kjörmönnum talið þó hann hafi ennþá gott forskot þar.

Hitt er svo mikilvægara fyrir hana að núna hefur hún náð að rétta sinn hlut í baráttunni nokkuð og ljóst að hún heldur áfram.

Það á þó ennþá við að hvorugt þeirra nær útnefningunni án sjálfkjörnu kjörmannanna.

Bitar og bútar úr prófkjörunum

Það er orðið endanlega ljóst að John McCain er forsetaefni Repúblikana í haust. Hann vinnur öll fjögur prófkjör dagsins og nær rétt rúmlega tilsettum kjörmannafjölda til að hljóta útnefninguna með því. Þetta var auðvitað löngu ljóst en er nú staðfest. Í framhaldinu mun Mike Huckabee draga sig til baka. Og svo mun McCain fá opinbera stuðningsyfirlýsingu frá Bush forseta á morgun. Spurning hvort það hjálpi honum innan flokksins í framhaldinu.

Hjá Demókrötum er hins vegar allt stál í stál í prófkjörum dagsins utan Vermont þar sem Obama vinnur stórt.

Manni sýnist þó miðað við útgönguspár og hvernig hlutirnir hafa þróast að Clinton vinni hin ríkin þrjú, þar með talið Texas. Þessir sigrar verða þó í naumari kantinum eða á bilinu 3-9% (stærstur í Ohio) að því að virðist og alls ekki víst að hún fái til dæmis fleiri kjörmenn í Texas en Obama vegna úthlutunarreglna þeirra þar. Þar kemur inn í að á eftir prófkjörinu var forval (caucus) og þar hefur Obama yfirleitt verið mun sterkari en hún (fyrir utan Nevada).

En svo geta útgönguspárnar verið alrangar og niðurstöðurnar allt öðru vísi en ef svo er ekki getur maður gefið sér eftirfarandi hugleiðingar.

Þessar niðurstöður gera ekkert annað en að framlengja baráttu þeirra en það er endanlega orðið ljóst að hvorugt þeirra getur náð tilskyldum fjölda kjörmanna í þeim prófkjörum sem eftir eru. Það eru sjálfkjörnu fulltrúarnir sem koma til með að ráða hvort þeirra hlýtur útnefningu flokksins nema þá að hitt komi til, að annað þeirra dragi sig út úr slagnum. Ég á ekki von á að það gerist úr þessu fyrr en í fyrsta lagi í lok apríl. Úrslit dagsins eru Clinton í vil því kosningarnar í dag snérust um það hvort hún héldi sér inni í slagnum eða ekki. Og úrslitin segja að hún geri það þó naumlega sé.