Obama vinnur í Vermont

Kjörstaðir hafa nú lokað í Vermont ríki og útgönguspár eru afgerandi varðandi sigur Obama í ríkinu. Líklegt virðist að hann vel yfir 60% atkvæða en Clinton í kringum 35% atkvæða.

Þetta er eitthvað sem sterklega var búist við og kemur því ekki á óvart en einungis er um að ræða 15 kjörmenn í Vermont og líkt og Rhode Island hefur tiltölulega lítil athygli beinst þangað. Hún er öll á Ohio og Texas þessa stundina.

Því má bæta við að slæmt veður í Ohio hefur einhver hamlandi áhrif á framkvæmd prófkjörsins þar og jafnvel talað um að sumum kjörstöðum hafi verið lokað og fólki gefinn kostur á að kjósa í prófkjörinu út vikuna þegar því hentar.

Þá vann McCain einnig sigur í Vermont og fær alla 17 kjörmenn ríkisins til sín.

Ekkert svar

Það eru stór og þung orð sem borgarstjórinn hefur uppi um Óskar Bergsson á borgarstjórnarfundi eins og sagt er frá í frétt á DV.is.

Borgarstjóri neitaði að svara og sagði að borgarstjórn setti niður með nærveru Óskars

Eitt er það að neita að svara spurningum, sem mér finnst að vísu persónulega frekar slappt svo ekki sé meira sagt, en að setja það fram að borgarstjórn setji niður með nærveru hans finnst mér verulega veruleikafirrt.

Þetta eru ummæli sem þurfa nánari útskýringar við frá borgarstjóra, verulegrar útskýringar.

Svei mér þá.

Mikilvægur kjördagur hjá Demókrötum

Í dag eru prófkjör í fjórum ríkjum Bandaríkjanna eins og margir vita og hjá Demókrötum eru prófkjörin (svolítið flóknara dæmi í Texas) í Ohio og Texas ákaflega mikilvæg vegna fjölda kjörmanna sem þau gefa.

Menn hafa verið að gera úr því skóna að eftir úrslit dagsins verði ljóst hver forsetaframbjóðandi Demókrata í haust verði. Ég held aftur á móti að slíkt sé ekki uppi á teningnum, úrslitin í nótt muni verða á þann veg að leikurinn jafnist frekar heldur en hitt og þá sé frekar rúm til að toga og teygja á hlutunum áfram.

Inn í þennan kjördag gengur Obama með nokkuð forskot og dágóða uppsveiflu með sér. Hann hefur dregið hratt og örugglega á forskot Clinton í skoðanakönnunum í ríkjunum tveimur síðustu tíu daga eða svo og virðist vera að síga fram úr henni í Texas til dæmis. En það eru blikur á lofti hjá honum. Auglýsing Clinton um varnarmál (3 am phonecall auglýsingin) virðist vera að virka henni í hag. Þá virðist það vera að fylgissveifla til Obama hafi hægt verulega á sér eða jafnvel gengið aðeins til baka síðustu tvo daga samkvæmt skoðanakönnunum. Þær eru þó sumar misvísandi enda um að ræða flókna samsetningu ólíkra þjóðfélagshópa.

Ný könnun sýnir líka fram á að kvartanir Clinton um að Obama fái mjúka meðferð fjölmiðla hafa breytt áherslum þeirra og hann tekinn mun fastari tökum undanfarna daga og vikur heldur en var áður.

Í dag voru líka liðsmenn Clinton að berja á Obama vegna tengsla hans við Tony Rezko, fasteigna(glæpa)manninn í Chicago.

As Democrats are prepared to begin voting...there are many, many, many more questions than answers for Senator Obama in regard to the Rezko matter," said Clinton communications director Howard Wolfson. "Democrats have a right to know these questions when considering who will be the best nominee to confront Senator McCain in the fall

Að þessu sögðu er það mín spá fyrir kvöldið að Obama vinni kjörmannasigur í Texas vegna kjörreglna þar en Clinton fái fleiri atkvæði þar. Clinton mun síðan vinna í Ohio með 8-10% mun, sem er meira heldur en flestir búast við. Þá mun Clinton vinna Rhode Island með yfirburðum (20+%) en Obama vinnur síðan Vermont með álíka yfirburðum eða meiri jafnvel.

Þetta leiðir af sér að kapphlaupið jafnast aðeins í kjörmönnum talið og Clinton telur sig fá "momentum" til að halda áfram í baráttunni og ef eitthvað er harðnar hún bara. Þetta eru ekki góðar fréttir fyrir Demókrataflokkinn því þetta gefur Repúblikönum ákveðinn höggstað á þeim því árásir á milli Obama og Clinton verða harðari eftir því sem barátta þeirra dregst á langinn og það gefur bara Repúblikönum vopn í hendur.

Össur alltaf í útrás

Nú er iðnaðarráðherra í Washington borg að ræða endurnýjanlega orkugjafa sem mér finnst vera hið besta mál.

Á ráðstefnunni koma saman ráðherrar, fulltrúar almannasamtaka og fyrirtækja til þess að ræða leiðir og samstarf um að auka hlut endurnýjanlegrar orku í orkubúskap heimsins og finna lausnir sem ganga í þá átt fyrir einstök svæði og lönd

Það er nauðsynlegt að ná lengra fram á þessu sviði upp á framtíðina að gera og í því verkefni þurfa allir að taka höndum saman um að ná lengra þannig að framtíðarlausn náist.

Bankaauglýsingar aðaláhugamál John Cleese?

John Cleese hefur orðið heimsfrægur á Íslandi síðustu misseri vegna oft á köflum alveg ágætra auglýsinga hans fyrir ónefndan banka.

En þessi vinna hans nær út fyrir Ísland en eftirfarandi auglýsing er pólsk. Ég sé ekki betur en móttívið sé ákaflega svipað og hér eða er það ekki?

Minnihlutahóparnir skipta líka máli, kleinuhringir kannski líka?

Á meðan að skoðanakannanir sýna fram á að Clinton og Obama séu nánast jöfn í fylgi í stóru ríkjunum tveimur sem halda prófkjör á morgun (Texas og Ohio) reyna þau allt hvað þau geta til að auka fylgi sitt. Í þeim slag er ekki hvað síst reynt að ná til ýmissa minnihlutahópa sem geta, þegar upp er staðið skipt máli varðandi lokaniðurstöðuna.

Nú er Obama farinn að sverfa að Clinton á enn einum vígstöðvunum hvað þetta varðar en það er meðal samkynhneigðra. Clinton hefur haft sterk tengsl við þann þjóðfélagshóp en nú virðist sem Obama sé að sækja verulega á meðal þeirra. Þetta er talið skipta máli í jöfnum slag eins og nú er.

Obama got a potential boost in Texas today as the Houston GLBT Political Caucus PAC, which claims to be the oldest gay and lesbian civil rights group in the South, endorsed the Illinois senator. The backing marks the first time the organization has endorsed a presidential candidate

Þá hefur Obama verið að stíga í vænginn við annan þjóðfélagshóp sem eru gyðingar og þar virðist honum verða nokkuð ágengt. Þar hefur hann þó átt við að eiga að hafa fengið opinbera stuðningsyfirlýsingu frá Louis Farrakhan, leiðtoga íslamista sem og að hafa sagt full góð orð í garð Palestínumann á síðasta ári. Það er vandratað í bandarískum kosningaslag, ég segi nú ekki meira.

Winning the trust of Jewish Democratic voters is all the more difficult for Mr. Obama because of the tenuous relations between blacks and Jews. He addressed that very issue at the Cleveland debate when he used the answer to the Farrakhan question to call for a renewal of the ties between blacks and Jews

Og þetta hér að ofan sýnir enn og aftur hvað kynþáttamálin skipta miklu máli. Það sama á við um samskipti "latino" og svertingja. En það er talið Obama til tekna að hafa komist vel í gegnum fund með leiðtogum gyðinga í síðustu viku, fund þar sem margar stórar og þungar spurningar voru lagðar fram en Obama virtist hafa svarað fullnægjandi.

Og svona í lokin þá var borið saman hve miklu hver frambjóðandi hefði eytt í kleinuhringjakaup í kosningabaráttunni. Þar hefur Clinton vinninginn með kleinuhringjakaup upp á 6000 dollara, Obama og McCain síðan með öðru hvoru megin við 3000 dollara. Athyglisvert var síðan að læknaði offitusjúklingurinn (bein þýðing úr orðalagi fréttarinnar sem ég sá þetta í, sem sagt ekki mitt), Mike Huckabee heldur sínu striki og kaupir enga kleinuhringi.

Þetta spannst út frá því að Bill Clinton var þekktur fyrir kleinuhringjakaup í sinni kosningabaráttu og Hilary sagði í upphafi sinnar að hún ætlaði sko alls ekki að fylgja manni sínum eftir í þessum efnum.

Svei mér þá.

Það sem vel er gert

Að kvöldi síðasta þriðjudags, 26. febrúar, fóru Björgunarsveitin Stefán í Mývatnssveit og Hjálparsveit skáta Reykjadal fram í Kistufell í björgunarleiðangur. Greint var frá þessum aðgerðum í fjölmiðlum þar sem allar helstu grunnupplýsingar komu fram. Ferðin tók rúmlega hálfan sólarhring og gekk ágætlega en tveir göngumenn höfðu óskað eftir aðstoð þar sem annar þeirra var ekki í stakk búinn að halda förinni áfram.

Þessum tveimur mönnum, pólskum er voru hér í hálendisferð, verður að hrósa fyrir nálgun þeirra á ferð þeirra hér um landið. Þeir voru ágætlega búnir og það sem meira er um vert að þá lögðu þeir fram ferðaáætlun og voru með fullar tryggingar fyrir sig kæmi eitthvað uppá eins og til dæmis að það þyrfti að sækja þá. Þetta er til fyrirmyndar og rétt finnst mér að halda þessu til haga.

Hitt er svo annað að til að tryggingar komi að björgunaraðgerðum sem þessum, þ.e. greiði kostnað björgunarinnar eins og menn eru auðvitað að tryggja sig fyrir, þarf að gera lögregluskýrslu. Og þar er vandamál í þessu tilfelli á ferðinni eftir því sem ég best veit.

Hinar umtöluðu auglýsingar í Texas og Ohio

Hér er auglýsing Clinton og umfjöllun um hana.

Obama var síðan snöggur að svara henni með þessari auglýsingu (umfjöllun).

Mikið í húfi greinilega næsta þriðjudag og kapalinn gengur hratt. Einhvernveginn finnst mér þessar auglýsingar ekkert sérstaklega líklegar til að breyta einhverju í baráttunni en málið horfir líklega öðruvísi við kjósendum í Ohio og Texas.

Hvað gerist þegar skoðanakannanir halla á Hilary?

Fyrir um það bil viku síðan hafði Hilary Clinton forskot á Barack Obama bæði í Texas og Ohio, forskotið í Ohio var meira að segja verulegt. En síðustu vikuna hefur heldur hallað undan fæti hjá henni og nú er svo komið að kannanir í Texas sýna Obama með forskot (4%) og í Ohio er Clinton með mjög naumt forskot sem er reyndar það naumt að munurinn er ekki marktækur.

Og hvað gerir maður þá? Jú fyrsta skrefið var að koma með mjög grimmar auglýsingar á móti Obama. Hann svarar þeim og þær virðast ekki virka neitt sérstaklega vel.

Þá er næsta skref að setja út á og jafnvel hóta málsókn í Texas vegna flókinna reglna (mjög flóknar) Demókrataflokksins þar við úthlutun kjörmanna í ríkinu. Annars vegar er um að ræða prófkjör en svo hins vegar forval (caucus) og í herbúðum Clinton er búið að reikna það út að þetta fyrirkomulag hampi Obama. Styrkur frambjóðendanna virðist nefnilega vera svæðisskiptur og þar sem Obama er sterkari er fleiri kjörmenn að fá.

Æ, æ. Reglurnar eru kunnar fyrirfram og það er ekki mjög traustvekjandi þegar menn reyna að fara að krukka í þær þegar séð er að þær geta unnið aðeins á móti manni.

Ég reikna með að þessu ljúki 5. mars með því að Clinton dragi sig út úr baráttunni, þetta verður eiginlega að fara að enda.

Hverjir eru þessir þeir?

Í framhaldi af færslunni minni um meirihlutaskipti í sveitarstjórn Þingeyjarsveitar ætlaði ég að fjalla aðeins um þennan undirskriftarlista sem ekið er með um Þingeyjarsveit þessa dagana.

Í sjálfu sér er ekkert nema gott um það að segja að fólk hafi áhuga á málefnum líðandi stundar í samfélagi sínu og komi skoðunum sínum á framfæri. Ein leið til þess er að safna undirskriftum með málstað sínum og verður sú aðferð sífellt vinsælli. Það er svona mánaðarlegur viðburður að Reykvíkingar afhendi borgarstjóra sínum undirskriftarlista um eitt og annað, hitt og þetta.

En hér í Þingeyjarsveit er þessi undirskriftarsöfnun svolítið á fölskum forsendum. Höfuðið er að það sé verið að skrifa undir að fram fari kosning í sveitarfélaginu um sameiningu þess við Aðaldælahrepp. En í rauninni er verið að safna undirskriftum gegn þessari sameiningu því þeir sem standa á bakvið þetta eru þeir sem ekki vilja þá sameiningu og urðu undir í sameiningarkosningum í nóvember. Nú á hins vegar að safna verulega liði á móti þessu og fella tillöguna.

Sá tími er bara liðinn. Það var kosið í nóvember og þá var tækifærið en í aðdraganda þeirrar kosningar kom skýrt fram á fundum að þetta væri möguleiki í stöðunni. Því tel ég að þá hafi verið kosið um sameiningu, ekki endilega þeirra þriggja sveitarfélaga heldur einfaldlega sameiningu þeirra sem vildu sameina.

Þessi undirskriftarsöfnun hér er ákaflega vel skipulögð, eiginlega með betri skipulagningu sem ég hef séð hér um slóðir. Það er keyrt um og valið fólk sent á ákveðna bæi þar sem horft er í áralöng vináttubönd, ættartengsl, vinnutengsl eða annað sem hentar. En þegar sendiboðar eru spurðir út í hlutina er fátt eða ekkert um svör og farið undan í flæmingi. Jafnvel fæst ekki upp hverjir standa að baki söfnuninni, "þetta er bara áhugahópur fólks" er svarið. Svo hart er gengið fram að fólk fær jafnvel tæplega frið í heimahjúkrun sem verið er að sinna.

Ég fékk heimsókn í gær eins og ég átti von á en að gömlum og góðum sveitasið ætlaði ég að bjóða til stofu og eiga spjall við viðkomandi. En því miður stóð illa á, góður en því miður sjaldséður gestur var í heimsókn hjá mér og því gat ég ekki sinnt hinu eins og ég vildi gert hafa. Því miður. Hins vegar var mér sagt í dag að það hefði sjálfsagt ekki skipt máli því sendiboðar höfðu stífa tímaáætlun og vildu hvergi kaffi þiggja, hvað þá meira.

En í lokin er vert að geta þess að sá aðili sem söðlaði um samstarfsfélaga hefur alltaf komið hreint fram í þessum sameingingarmálum. Hann gaf út það sem hann vildi fyrir síðustu sveitarstjórnarkosningar og öllum átti að vera ljóst hvar hann stæði í þessu máli og hvað hann myndi að hafast í því. Þetta áttu bæði kjósendur og samstarfsaðilar á framboðslista að vita en kannski hafa menn haldið að hann myndi hreinlega lúffa með sitt.

PS Og eitt var rangt hjá Hildi Jönu í kvöldfréttatíma sjónvarpsins. Ásvaldur, fráfarandi oddviti, er Þormóðsson en ekki Þorvaldsson. Að auki set ég spurningamerki við val hennar á síðasta viðmælanda hennar í fréttinni.

Svei mér þá.