Obama sigrar í Georgiu?

Um leið og kjörstaðir loka í Georgíu, sem er fyrsta ríkið sem gerir það í dag, þá hefur Obama verið lýstur sigurvegari af einhverjum fréttaveitum. Og ef maður skoðar og treystir eitthvað á útgönguspárnar þá er það stór sigur. Sýnist að það sé Obama 65% og Clinton 31% eða eitthvað í líkingu við það.

Búist var við sigri Obama í þessu ríki en ég hef ekki séð að það benti neitt til svona stórs sigurs.

Uppfæri tölur seinna í kvöld.

PS Georgía hefur 87 kjörmenn og 16 sjálfkjörna að auki

Samkvæmt útgönguspá hjá Repúblikönum virðist vera ákaflega mjótt á munum en svo virðist sem Huckabee sé skrefi á undan með 32-33%, Romney með 31% og McCain 29-30%. Semsagt of mjótt á milli til að geta sagt hvernig það fer á endanum.

Væntingar talaðar niður

Svona meðan maður bíður eftir að fyrstu tölur líti dagsins ljós vestan hafs og maður geti skoðað útgönguspárnar þá hefur maður aðeins kíkt á hvað gerst hefur í dag í baráttunni.

Það eru komin ein úrslit, sigur fyrir Huckabee í Vestur-Virginíu. Talinn vera óvæntur sigur því reiknað var með sigri Romney þar og í kjölfarið fóru af stað ásakanir úr herbúðum hans um að McCain hefði séð til þess að hans fólk kysi Huckabee í seinni umferðinni (sjá fyrri færslu). Þetta er talið geta haft neikvæð áhrif á Romney í þeim ríkjum sem eftir eru, einnig vegna þess að hann ætlaði sér líklegast að nota sigur þarna sem stökkpall í lokabaráttuna í öðrum ríkjum dagsins.

Af þeim Clinton og Obama er það helst að segja að þau hafa helst talað niður væntingar sínar í dag, verið afar hógvær (eða þeirra starfsmenn) og talið sig ánægð með minni hluta kjörmanna og ríkjasigra en margir hafa talað um að sé ásættanlegt fyrir þau hingað til.

Það sem vekur mesta eftirtekt er að Clinton er búin að bóka sig í þrjár kappræður í febrúar (10.-27. og 28.) en það hefur hingað til verið talið merki þess sem hefur á brattann að sækja að tryggja sér kappræður fyrir ofur þriðjudaginn.

Held samt að ég breyti spá minni fyrir kvöldið og segi að Clinton brosti örlítið meira en Obama eftir daginn. Henni vöknaði nú líka aðeins um augu í gær, eitthvað sem hefur ekki gerst síðan í New-Hampsire, og það virkaði þar.

Og það var og.

Fyrsta ríki dagsins með úrslit

Vestur Virginía er fyrsta ríki ofur þriðjudagsins til að birta úrslit sín. Hjá þeim er kerfið einfalt (eða kannski ekki), einna líkast því sem við myndum þekkja hér á landi. Lokaður fundur þar sem kosið er á milli manna í tveimur umferðum, fyrst á milli allra en síðan milli tveggja efstu þar sem sá sem sigrar fær alla kjörmennina.

Huckabee sigraði Romney í síðari umferð með 52% gegn 47% og fékk þar með alla 18 kjörmenn Vestur Virginíu sem í boði voru í dag en 9 til viðbótar er síðan úthlutað í prófkjöri 13. maí að því að mér skilst.

Ætli spá mín síðan fyrr í dag sé að rætast?

Það má bæta því við að Demókrata halda prófkjör sitt í Vestur Virginíu 13. maí.

Tæknin notuð til hins ítrasta

Síðustu kippir kosningabaráttu Clintons og Obama fóru fram með aðstoð tækninnar í formi tölvupósta. Fyrir utan auðvitað þvæling og fundahöld þeirra sjálfra.

Hin ýmsu félagasamtök, sem eru hliðholl öðru hvoru þeirra hafa seinustu daga, en aðallega í gær, sent frá sér tölvupósta til að koma höggi á hinn aðilann en um leið að auka fylgi síns manns. Það stærsta í þessu virðist mér vera frá baráttusamtökum kvenna varðandi fóstureyðingar þar sem sótt er að Obama vegna afstöðu hans áður í þeim málum og því var svarað um hæl úr herbúðum hans.

Athyglisvert, netið spilar alltaf stærri og stærri þátt.

Annars spái ég McCain góðum sigri í kvöld, mun stærri en menn búast við þó svo að Romney hafi sótt að honum í Kaliforníu. Og þá held ég að Huckabee fái meira fylgi en gert er ráð fyrir.

Hjá Demókrötum held ég að Obama komi aðeins betur út en Clinton án þess þó að vera talinn stór sigurvegari dagsins.

Sjáum til.

Kjörþokki

Niðurlag kosningabaráttu Hilary Clinton er hægt að draga saman í eitt orð samkvæmt Chris Cillizza sem bloggar hjá Washington Post og það er kjörþokki.

"Ég er líklegri til að vinna forsetakosningarnar í haust, þannig ef Demókratar vilja vinna þær þá er betra að kjósa mig" segir Clinton.

En er þetta að virka? Líklega ekki þar sem nákæmlega þetta atriði skiptir fáa kjósendur höfuðmáli og þeir kjósendur sem telja svo vera eru ekkert síður hrifnir af Obama.

Svo er það hitt að samkvæmt "head to head" könnunum þá myndi Obama líklega ekki ganga neitt síður í forsetakosningum í haust en Clinton.

Það held ég.

Prófkjörssúpan á morgun

Á morgun eru prófkjör í 24 ríkjum Bandaríkjanna. Í einum 19 ríkjum hafa báðir flokkar prófkjör en síðan eru Demókratar með í þremur að auki og Repúblikanar tveimur öðrum. Sem sagt kosningar í 24 ríkjum í heildina.

Stutt og skýr greining á ástandinu: McCain kemur út sem sigurvegari hjá Repúblikönum en hjá Demókrötum stefnir allt í jafntefli.

Þetta er stutta útgáfan en eins og við allar stuttar útgáfur má spyrða við lengri gerð og hún fer hér á eftir hjá mér.

Wall Street Journal telur að þrátt fyrir jafnteflislíkur þá geti Clinton ennþá komið út úr slagnum á morgun sem sigurvegari:

by capturing majorities in California; Sen. Clinton's home state of New York and next-door New Jersey; former home state Arkansas; Tennessee, which has fewer black voters than other Southern states; and in at least one of a group of states where Sen. Obama is competitive -- Connecticut, Massachusetts, Arizona and Missouri.

Vandamálið er bara að Obama hefur verið að sækja í sig veðrið (og fylgið) hratt og örugglega undanfarna daga og það eru þónokkuð mörg ríki sem skoðanakannanir sýna of mjótt á munum til að segja fyrir um sigurvegara í þeim. Spurningin í gær var hvort ofur þriðjudagurinn kæmi of fljótt fyrir Obama en spurningin í dag er hvort ofur þriðjudagurinn komi of seint fyrir Clinton. Svona hefur þetta breyst á stuttum tíma.

Þrátt fyrir þann mikla fjölda ríkja sem kosið er í á morgun er mest horft til eins ríkis, Kaliforníu. Fjölmennasta ríkið og gefur þar af leiðandi flesta kjörmennina, heil 18% af þeim fjölda kjörmanna sem þarf til að hljóta útnefningu flokksins. Þar sýna kannanir að Obama sé kominn fram úr Clinton (síðan er hann að auki kominn með betra hlutfall í "intrade" þar sem veðjað er á sigurvegara, 42-40, og sumir vilja meina að það sé betri vísbending en kannanirnar).

Eitt er þó ljóst. Úrslitin ráðast ekki hjá Demókrötum á morgun en líklegast er að það verði klárt jafntefli þar sem kjörmönnum hjá Demókrötum er úthlutað hlutfallslega en ekki eins og hjá Repúblikönum þar sem sigurvegari ríkis fær alla kjörmenn þess. Þá er líklegt að Obama haldi áfram að sækja í sig veðrið og vinna á í þeim ríkjum sem kjósa síðar. Þá er einnig talið að hann sé að fá meiri hljómgrunn meðal sjálfkjörinna kjörmanna (superdelegates) og þeir skipta ekki svo litlu máli, eru um 800 talsins.

Meira fljótlega.

Strýta og Kjarnafæði

Af hverju er rækjuverksmiðjunni Strýtu á Akureyri lokað? Samkvæmt fréttatilkynningu frá Samherja er það vegna bágs ástands í greininni á Íslandi og þar af leiðandi hallarekstrar verksmiðjunnar. Heppilegt að það var til eignarhaldsfélag sem kom þá og keypti lóð og hús á milljarð.

Ætli það geti verið að þetta hafi verið á hinn veginn? Eignarhaldsfélagið kom og bauð í eignir og þá var slegið til og selt. Mínar heimildir segja svo. Erfiðleikar voru í rekstrinum sem byrjuðu fyrir rúmlega tveimur árum en þá var ráðist í hagræðingu. Á mannamáli þýðir það að farið var niður í eina vakt og verksmiðjan undirmönnuð. Það var farið að skila hagnaði og þá kemur þessi sala til sem virkar frekar kaldranalega til þeirra sem unnið hafa að því að rétta reksturinn af innan verksmiðjunnar. Það fara einhver störf við þetta, spurning hvað kemur í staðinn.

Er verið að bera fyrir sig erfiðleikunum til að innleysa mikið fjármagn á auðveldari hátt en að standa í verksmiðjuharki? Gæti verið.

Stjórnmálaflokkar klofna

Eitt af því sem Björn Bjarnason ræddi um í Silfri Egils í dag var Evrópusambandið og aðild Íslands að því. Hann er mótfallinnn því eins og flestir vita sjálfsagt og má það alveg mín vegna. Það eru rök með og á móti aðild en eftirfarandi rök finnast mér vera veik. Björn sagði:

Og ef það á að setja það á oddinn þá mundu stjórnmálaflokkarnir klofna, hver á eftir öðrum og þurfum við á því að halda hér á þessu landi miðað við hvað við höfum góða stöðu gagnvart Evrópusambandinu, hvaða tal er þetta?

Mín sýn á þetta er að það á að skoða þessi mál með hagsmuni Íslands og Íslendinga að leiðarljósi en ekki út frá því hvort stjórnmálaflokkar klofna. Stjórnmálaflokkar eru ekki höfuðatriðið heldur hagsmunir landsmanna, ekki hvað síst í svona stórum málum.

Svo á ég eftir að skoða betur varaliðsþátt Silfursins í dag.

Romney vinnur í Maine

Það gengur frekar rólega að fá lokaniðurstöðu í Maine ríki enda sýnist mér við nánari athugun að forvalið fari fram 1.-3. febrúar þó svo það sé skráð allsstaðar á 2. febrúar. En nú er búið að ganga frá 68% atkvæða (ég tala um atkvæði en það er ekki fyllilega rétt kannski þar sem um "caucus" er að ræða), og staðan hefur lítið breyst frá fyrstu tölum.

Þó er búið að lýsa Mitt Romney sigurvegara forvalsins í Maine en annars er staðan svona:

Romney 52%

McCain 22%

Paul 19%

Huckabee 6%

Undecided 2%

Ég reikna ekki með því að þessar hlutfallstölur breytist stórlega, í mesta lagi 2-3% á hvern frambjóðanda.

Maine bauð upp á 21 kjörmann og þrátt fyrir sigur sinn er Romney enn að baki McCain í fjölda kjörmanna enda virðist hann á leiðinni út úr kapphlaupinu á þriðjudaginn. Sjá góðar skýringar á því hér.

Nýjustu tölur úr Maine

Þegar hafa verið afgreidd tæplega helmingur atkvæða í forvali Repúblikana í Maine ríki þá er Mitt Romney langefstur. Hann er með 52%, McCain er síðan næstur með 22% og síðan er Ron Paul með 19%. Mike Huckabee rekur síðan lestina með 5%.

Engin áhersla var lögð á þetta forval af neinum frambjóðanda fyrir utan að Ron Paul rétt leit þar við. Það skýrir líklega velgengni hans miðað við flest önnur ríki sem kosið hefur verið í til þessa. Annars er það nokkuð ljóst að Romney vinnur, spurningin er bara með hvaða mun.

Lokatölur síðar.