Eftirhreytur prófkjöra gærdagsins

Fyrst hjá Repúblikönum. McCain vann alla þrjá slagina þar sem minnsti munurinn var í Virginíu, 9% eða þar um bil. Það er ljóst að Huckabee getur engann veginn náð honum í kjörmannafjölda og því endanlega ljóst að McCain er forsetaframbjóðandi Repúblikana í haust.

En það var ekki fullt beð af rósum hjá McCain í gær. Fyrir það fyrsta þá hefur verið álitið að hann nái ágætlega til óháðra kjósenda en það virtist ekki svo vera í gær í Virginíu. Þeir kusu Huckabee frekar. Ljósu punktarnir eru þó þeir að McCain virðist vera búinn að vinna á sitt band hluta íhaldsmanna:

On the GOP side, McCain finally scored a breakthrough win Tuesday by winning the conservative vote in Maryland, which could be a sign that the Northern conservative vote is coalescing around him

En ekki alla:

Although he holds a nearly insurmountable lead over former Arkansas Gov. Mike Huckabee, McCain still hasn't turned the corner with the Southern conservative vote

Huckabee heldur samt áfram í skjóli tiltölulega naums taps í Virginíu, segir að Repúblikanar þurfi að hafa rödd sína áfram í slagnum.

Og þá að Demókrötum. Obama vann stórt, jafnvel stærra en reiknað var með og Clinton er í vandræðum, ekki spurning um það. Þau hafa birst undanfarið í fjármálum og mannahaldi en í gær koma nýjar áhyggjur fyrir hana fram.

Svo virðist nefnilega vera, samkvæmt útgöngukönnunum, að Obama sé að fá meiri stuðning frá þeim kjósendahópum sem Clinton hefur stólað á fram að þessu. Obama fékk nefnilega meiri stuðning í gær frá konum, eldri borgurum og "latino" kjósendum heldur en hann hefur fengið hingað til og menn reiknuðu með í gær. Góðar fréttir fyrir hann ef þetta er ekki einstakt fyrir gærdaginn en slæmar fyrir Clinton.

En hvað getur Clinton gert? Um eitt atriði eru menn sammála og það er að hún þurfi að hamra á efnahagsmálum næstu vikurnar. Þar hefur hún forskot á Obama og það verður hún að nýta sér.

Svo eru nokkur atriði önnur sem talað er um. Hún þarf að koma sér í fréttirnar, bæði sjálfri sér og svo jákvæðri umfjöllun um fjármálin hjá henni þar sem hægt er að sýna fram á sterkan grunn hennar í framlögum sem skila sér í gegnum netið.

Síðast en ekki síst er talað um að hún þurfi nauðsynlega á því að halda að ganga vel í Wisconsin í næstu viku, betur en allir segja til að hafa eitthvað að byggja á næstu vikurnar. Ef það gerist ekki sé henni nauðsynlegt að fá stóran hóp sjálfkjörinna kjörmanna til að styðja sig en það virðist ekki vera í spilunum því þeir virðast flestir halda að sér höndum þangað til eftir Texas og Ohio prófkjörin.

Þá er það orðin víðtækari skoðun meðal stjórnmálaskýrenda vestan hafs að Clinton þurfi að vinna örugglega í Texas og Ohio annars sé slagurinn hreinlega búinn hjá henni.

Ég held samt ennþá að hún hafi þetta, það er of mikil reynsla hjá henni til að telja hana af strax.

Obama og McCain vinna prófkjörin í Maryland og Washington DC

Þegar kjörstöðum í Maryland ríki var lokað, sem var einni og hálfri klukkustund síðar en ráð var fyrir gert vegna óveðurs, voru Obama og McCain lýstir sigurvegarar þar.

Það var við því búist að Obama ynni Maryland og sú er raunin, spurningin bara hve stórt. Það virðist þó vera svipað og úrslitin í Virginiu.

Það sama er uppi á teningnum í Washington DC (District of Columbia) en þar vinna þeir Obama og McCain sigra í prófkjörinu þar. Þar eru sigrarnir þó mun stærri en í hinum ríkjum dagsins, sér í lagi hjá Obama en það stefnir í 75-25% sigur hans á Clinton.

Þá aukast vandræðin enn hjá Clinton. Í fyrradag var tilkynnt um nýjan framkvæmdastjóra kosningabaráttu hennar og í kvöld hætti aðstoðarframkvæmdastjórinn. "You can´t fire the candidate so you have to fire the staff" var sagt um þetta á CNN.

Þetta virðist vera gert sökum þrýstings frá þeim aðilum sem leggja Clinton til fjármagn í kosningabaráttuna og sýnir að ekki hefur verið hugsað um langtímaplan fram yfir ofur þriðjudaginn. Þá átti allt að vera klappað og klárt en nú eru menn farnir að tala um að sjálfkjörnu kjörmennirnir fari jafnvel að rjátlast af henni í kjölfar margra ósigra, í það minnsta muni ekki margir bætast á listann á næstunni.

Clinton var strax farin í baráttu í Texas og virðist því ætla að sigla framhjá þessum tveimur ríkjum í næstu viku og leggja allt í sölurnar í Texas og Ohio.

Úrslit, DC

Obama 76%, Clinton 24%.              McCain 67%, Huckabee 17%, Paul 8%, Romney 6%

Líkleg úrslit, Maryland

Obama 62%, Clinton 35%.             McCain 55%, Huckabee 30%, Paul 6%, Romney 6%.

Obama vinnur í Virginíu

Nú er búið að loka kjörstöðum í fyrsta ríki dagsins af þremur sem er með prófkjör og það stendur ekki á fréttamiðlunum að lýsa sigurvegara um leið og það gerist.

Obama hefur verið lýstur sigurvegari í Virginíu ríki á grundvelli útgönguspár. Mér sýnist að hann fái í kringum 60% fylgi, svona rúmlega kannski og Clinton hátt í 40%.

Þetta er það ríki dagsins sem stjórnmálaskýrendur töldu helst að Clinton ætti möguleika á að vinna en það virðist ekki ganga eftir.

Uppfært: Þegar rúmlega þriðjungur atkvæða hefur verið talinn er staðan þannig hjá Demókrötum að Obama er með 67% og Clinton 32%. Niðurstaðan verður sjálfsagt á þessa lund, kannski 1-2% til eða frá.

Hjá Repúblikönum er hins vegar staðan nánast hnífjöfn, McCain og Huckabee báðir með 46% atkvæða en Paul % og Romney 3%. Mjög spennandi þar og enn er Huckabee að setja strik í reikninginn hjá McCain þrátt fyrir sífellt háværari raddir um að hann eigi að draga sig úr baráttunni.

Það virðist hins vegar ætla að verða mun jafnari leikur hjá Repúblikönum. Þar leiðir Huckabee samkvæmt fyrstu tölum en útgönguspár gera ráð fyrir naumum sigri McCain (ca.3-4%).

Nú hefur CNN lýst McCain sigurvegara hjá Repúblikönum í Virginu ríki þegar búið er að telja tæplega 60% atkvæða. Þá er hann með 47% en Huckabee 44%. Mjög lítill munur á milli þeirra en samt sem áður er McCain lýstur sigurvegari.

Samkvæmt útgönguspám hjá Demókrötum leiðir Obama 90-10% meðal svartra kjósenda en Clinton 51-48% meðal hvítra kjósenda. Það virðist reyndar vera eingöngu meðal hvítra kvenna sem Clinton leiðir Obama. Svo finnst mér líka athyglisvert að af þeim sem ákváðu í dag hvort þeirra þeir kysu varð Clinton frekar fyrir valinu.

Úrslit:

Obama 64%, Clinton 36%

McCain 50%, Huckabee 41%, Paul 5%, Romney 3%

Molar úr prófkjaraslagnum

Það eru þrjú prófkjör í dag í forsetaútnefningarslagnum vestan hafs. Í Maryland, Virginíu og Kolombíuhreppi (DC). Samtals er um að ræða 168 kosna kjörmenn hjá Demókrötum en 110 hjá Repúblikönum.

Flestir reikna með sigri Obama í þessum þremur prófkjörum dagsins og jafnvel í næstu viku líka en þá er kosið í tveimur ríkjum, forval á Hawaii og prófkjör í Wisconsin hjá Demókrötum en prófkjör í Washington ríki og Wisconsin hjá Repúblikönum.

Ég reikna með góðum sigrum hjá Obama í kvöld og að McCain haldi áfram að eiga við Huckabee.

Útlitið er ekkert sérstakt hjá Clinton. Hún var í fjárhagskreppu með baráttuna eftir ofur þriðjudaginn, sem þó er búið að leysa núna virðist vera. Sumpart var það vegna þess að það var reiknað með að hún yrði búin að klára dæmið 6. febrúar og því var eytt miklum fjármunum of snemma miðað við hver raunin varð í baráttunni. Svo er hún búin að stokka upp í stjórn baráttunnar hjá sér en það nýjasta er að það eru farnar að koma heimildir innan úr herbúðum hennar að staðan sé ekki góð framundan. Það er semsagt komin pressa á hana frá sjálfkjörnum kjörmönnum og fjárhagslegum stuðningsaðilum um að hún verði að fara að gera betur en nú er. Krafan er sú að Clinton verði að vinna Texas og Ohio stórt annars eigi hún að draga sig til baka.

Ég veit ekki með það en ég hef hingað til reiknað með því að hún hljóti útnefningu Demókrata og held það ennþá. Obama þarf að vinna Ohio og þá verður staðan kannski önnur!

Annars hafa Repúblikanar reynt að gera sér mat úr þessari löngu og ströngu baráttu og segja hana kljúfa Demókrata. Þetta var afgreitt á eftirfarandi hátt í Washington Post í dag:

What gives Democrats heart -- and clearly worries Republicans -- is that the Obama-Clinton contest does not reflect a deep, ideological split within the party. The Republican Party appears to be more divided along ideological lines right now

Eins og þeir vita sem verið hafa að taka prófin um frambjóðendurna vita þá skora þau Obama og Clinton yfirleitt mjög nálægt hvort öðru hjá þeim. Það er nákvæmlega aðalmálið í þessu, þau eru ekki svo langt frá hvort öðru hugmyndafræðilega séð í stórum dráttum.

Annars var Obama frjálslyndasti öldungadeildarþingmaðurinn árið 2007. Veit ekki hvort það hjálpar honum neitt í baráttunni.

Umburðarlyndi

Einhversstaðar las ég að umburðarlyndi væri farið úr tísku. Ég held að það sé rétt með farið.

Sumpart er það vegna tímanna sem eru uppi núna og virðast að miklu leyti byggjast á einstaklingshyggju og öllu því sem henni fylgir.

Sumpart er þetta vegna uppeldislegra galla. Það er ekki gefinn tími í að sinna þessum hluta í uppeldinu og það verður því í takt við

Einn hluti lausnar við þessum vanda er að auka vægi siðfræðikennslu í skólum, alveg frá leikskóla upp í háskóla. Einnig að auka siðfræðikennslu í kennaranámi.

Svei mér þá.

Getur verið...

Þegar maður fer yfir atburði borgarmálanna í dag, svona létt í huganum, kvikna örfáar spurningar.

Getur það virkilega verið að Sjálfstæðisflokkurinn sé svona rækilega klofinn með grimm fylkingaátök innanborðs eins og margir hafa viljað vera láta í dag? Ég hef ekki lagt trúnað á það hingað til en það eru farnar að renna á mann tvær grímur með það. Getur það verið að ástandið sé að sigla í svipað horf og var í uppgjöri innanflokks um og uppúr 1980.

Hvernig verður samband fjölmiðla við Sjálfstæðismenn í kjölfar þessa fundar í dag? Það var augljóslega reynt að hafa áhrif á aðkomu þeirra að málinu og af veikum mætti stjórna aðgangi þeirra. Samband fréttamanna og stjórnmálamanna hefur byggst á gagnkvæmum skilningi og aðgengi hvors hóps að hinum. Atburðir síðustu daga gætu haft áhrif til hins verra þar fyrir Sjálfstæðisflokkinn gæti manni dottið í hug.

Einhvernveginn fannst manni svo Vilhjálmur vera einn á báti, ekki búið að segja honum upp af samstarfsfélögum sínum. Það aftur á móti stafar ekki af því að hann njóti fulls stuðnings og trausts þeirra heldur miklu frekar vegna þess að ekki er fullur stuðningur eða traust í garð þess sem á eftir kemur. Ekki ennþá. Vilhjálmur látinn hanga til þerris í sinni umhugsun á meðan það er útkljáð. Ekki góð framkoma það.

Svei mér þá.

Gagnslausir molar úr demókrataslagnum

Alveg ótrúlegir þessir Ameríkanar. Nú er Obama-mentum orðið svo víðtækt að það er farið að virka út fyrir kosningabaráttuna. Hann fékk nefnilega Grammy-verðlaun í gær og var þar tekinn fram yfir Bill Clinton. Obama er þá kominn með 2 Grammy verðlaun á móti 2 hjá Bill og einum hjá Hilary.

En þetta, ásamt stórum sigrum helgarinnar, gefa Obama byr undir báða vængi fyrir komandi prófkjör og forvöl. "Potomac" prófkjörin á morgun og svo Hawaii og Wisconsin á þriðjudaginn eftir viku.

Á meðan hamast menn í herbúðum Clinton við að draga úr væntingum þessa mánaðar, hrista upp í eigin herbúðum og stefna á stóra og mikla hluti í mars í staðinn. Spurningin hvort það verði of seint að gera eitthvað þá.

Svo er enn verið að telja í Nýja-Mexíkó ríki. Þar var ég aðeins búinn að minnast á vandræði í kosningunni sjálfri og það er ennþá verið að vinna úr því. Mjótt á munum og spurningin hvort það verði jafntefli í kjörmönnum þar eða Clinton vinni með tveimur.

Erum við í Sovétríkjunum?

Þessa spurningu heyrði ég áðan í sambandi við fréttamannafund-fréttamannaviðtöl Vilhjálms Þ. núna áðan.

Svei mér þá ef það er ekki bara eitthvað til í þessu. Hvaða hugmyndaflug er það eiginlega að ætla sér að stýra fjölmiðlunum á þann hátt að tala við fulltrúa þeirra einn og einn í einu? Það var þó hálf brotið á bak aftur en þó ekki.

Og svo er auðvitað bara haft það sem verst er fyrir Vilhjálm í fjölmiðlunum. Getur það verið að það sem verst er sé það sem þarf að spyrja um?

Þar fyrir utan hefðu nú fjölmiðlafólkið, sem beið dágóða stund eftir þessu líka svakalega viðtali við Vilhjálm, getað unnið sína vinnu aðeins betur. Samræmt sig aðeins í spurningum en ekki verið gjammandi yfir allt og alla meðan á stóð. Það hefði gefist betur.

En hálf gagnslaus fundur þegar upp er staðið.

Svei mér þá.

Nýjasta tíska eða...

Manni fer hreinlega að detta í hug að það sé nýjasta tíska hjá ráðherrum ríkisstjórnarinnar að vera með vafasamar og umdeildar ráðningar í hátt skrifuð opinber embætti. Eða þá að þetta sé stefna sem mörkuð var í stjórnarsáttmála síðasta sumar.

Héraðsdómari, orkumálastjóri, ferðamálastjóri, forstjóri Umhverfisstofnunar og kannski fleira.

En ef þetta er keppni þá er staðan 3-1 fyrir Samfylkinguna er það ekki?

Kannski er þetta tíska í hina áttina, þ.e.a.s. að kæra ef maður fær ekki skipun. Sýnist samt í fljótu bragði að svo sé ekki.

Svei mér þá.

Stormur í vatnsglasi?

Átti einhver von á því að Moggabloggið yrði alltaf auglýsingafrítt, þ.e.a.s. síður einstaklinganna? Ég átti ekkert frekar von á því að minnsta kosti. Ég get ekki alveg séð að ég hafi fullan yfirráðarétt yfir síðunni þar sem ég rek ekki kerfið, þetta væri annað mál ef ég bæri allt í kringum þetta sjálfur.

En þetta er forljót auglýsing reyndar sem er komin inn og er hálfpartinn úr takt við allt yfirlit síðunnar minnar. Maður venst þessu þó fljótlega held ég.

Þetta er kannski bara stormur í vatnsglasi.