Gríðarlega harður slagur í gangi þó fimm vikur séu í næsta prófkjör

Þrátt fyrir að gott hlé sé nú á milli prófkjöra hjá Demókrötum í Bandaríkjunum er slagurinn engu að síður gríðarlega harður. Hilary Clinton er í mjög beinskeyttri baráttu um að fá stuðning sjálfkjörinna landsfundarfulltrúa og notar þar Bill og Chelsea ákaft. Obama gefur henni lítið eftir en það fer einhvernveginn eitthvað minna fyrir honum í þessari baráttu.

Staðan á milli þeirra þar er annar sú að Clinton er með atkvæði 248 þeirra eins og er en Obama nýtur opinbers stuðnings 213 en 334 eiga eftir að lýsa yfir stuðningi við annað hvort þeirra. (Tölur samkvæmt RCP).

Málið með þessa landsfundarfulltrúa er, þrátt fyrir nokkurt forskot Clinton á Obama meðal þeirra, þá hefur það bil minnkað all verulega undanfarnar vikur og það hefur dregið verulega úr líkunum á því að Clinton hljóti útnefningu flokksins sem forsetaefni hans. Spurningin er hreinlega að verða sú hve lengi þrjóskast hún við.

A funny thing is happening. While Hillary and Bill appeal to super delegates to override the will of the voters and back Hillary, the super delegates are doing just the opposite

Og miðað við hvernig landslagið virðist liggja í þeim prófkjörum sem eftir eru verður Clinton líklega að fá stuðning yfir 2/3 hluta (líklega um 220 af 334) sjálfkjörnu fulltrúanna sem enn eiga eftir að lýsa yfir stuðningi við annað hvort þeirra. Ég sé ekki að það komi til með að gerast.

Mér virðast því öll vötn renna til Dýrafjarðar í þessum efnum.

Ekki nema von

Það er ekki nema von að æði mörg sérsambönd vilji sérstaka íþróttarás fyrir sínar greinar vegna umfangs boltagreina í umfjöllun helstu fjölmiðla landsins.

Auðvitað verður að taka tillit til og bregðast við vinsældum einstakra íþróttagreina en að eyða innslagi í íþróttaþætti í tölvuleikjamót í fótbolta eins og RÚV gerði í gærkvöldi er eiginlega of mikið.

RÚV hefur líka ríkari skyldur á herðum en aðrir fjölmiðlar um fjölbreytni í þessum efnum en er ekki að standa fyllilega undir því svo ekki sé meira sagt.

ESB

Heitasta málið í dag virðist vera ESB, ja svona fyrir utan Vaðlaheiðargöng, sundabrautina og upplausn á Landspítalanum. Það er svo sem af nógu að taka.

En varðandi ESB þá held ég að það sé kominn tími á að breyta aðeins nálguninni á umræðu um þau mál öll sömul. Þrátt fyrir að hafa alla tíð verið á móti aðild að Evrópusambandinu hef ég aldrei talið annað en í framtíðinni kæmi að því að taka ákvörðun um aðild. Það yrði þá gert á þeim grunni að viðræður væru búnar að eiga sér stað milli Íslands og Evrópusambandsins um fulla aðild Íslands að sambandinu og þá gæti maður tekið afstöðu á grundvelli staðreynda sem fyrir lægju úr þeim aðildarviðræðum.

Núna finnst mér þessi tími vera kominn. Núna á að setja fram samningsmarkmið Íslands í aðildarviðræðum við ESB og í framhaldi af því að fara í aðildarviðræður og sjá hvort samningsmarkmið okkar næðust fram í þeim viðræðum.

Síðan á að leggja það sem kemur út úr þeim viðræðum í þjóðaratkvæðagreiðslu. Þá hefur almenningur staðreyndir úr aðildarviðræðunum til að byggja atkvæði sitt á en ekki fyrr.

Í dag grundvallast nefnilega umræðan á frösum, skotum, sleggjudómum og svo auðvitað engri umræðu. Það sem ég vildi sagt hafa er að það eru engin rök í gangi því ekkert er fast á borði og þá geta allir látið gamminn geysa eða þagað, allt eftir atvikum.

Ef íslenska flokkakerfið ræður ekki við þetta, þ.e.a.s. ef liðsmenn flokkanna ráða ekki við þetta verkefni vegna hræðslu um að flokkarnir klofni, þá verður að fá nýja hugsun í nálgunina.

Ég vil sem sagt fara í aðildarviðræður við Evrópusambandið á grundvelli skilgreindra samningsmarkmiða út frá stöðu og hagsmunum Íslands. Síðan vil ég taka ákvörðun á þeim  grundvelli, sem við þetta skapast.

Grænlandssléttbakurinn ekki alveg dauður

Hvernig er hægt að vanáætla stofnstærð Grænlandssléttbaksins? Það er ekki eins og þetta séu eitthvað lítil dýr.

Kanadískir vísindamenn hafa fundið allt að 40.000 Grænlandssléttbaka sem lifa í norðurhöfum. Kanadíska sjávar- og fiskveiðiráðuneytið segir að stofn Grænlandssléttbaka sé miklu stærri en menn hafi haldið til þessa. Talið var að hvalategund þessari hefði verið nær útrýmt á árum áður og í stofninum væru einungis 300-400 hvalir

Það er helvíti mikill munur á 400 dýrum og 40 þúsund dýrum. Þetta eykur ekki alveg tiltrú manns á þeim tölum sem eru í gangi fyrir aðrar hvalategundir um þessar mundir.

Höfum þetta innan siðsamlegra marka

Undanfarnar vikur hafa borið með sér beinskeyttar árásir, ummæli og fleira í þeim dúr á milli Barack Obama og Hilary Clinton. Nú hafa þau rætt saman um að reyna að róa niður stuðningsmenn sína á komandi vikum eða meðan kosningabarátta þeirra stendur yfir.

They agreed that the contrasts between their respective records, qualifications and issues should be what drives this campaign, and nothing else said Clinton spokesman Phil Singer

An Obama adviser gave a similar account, while stressing that it was Obama who approached Clinton on the subject. They committed to making sure that their supporters don't get overheated in the future, the adviser said

Þetta hefur nefnilega verið svolítið á þann veg undanfarið að fólk í báðum herbúðum hefur gengið full langt í stuðningi sínum við sinn aðila og það gerir í raun ekkert annað en að vekja úlfúð innan flokksins og skaða hann útávið fyrir sjálfar forsetakosningarnar í haust.

It followed a week of harsh words that led to resignations in both camps. Samantha Power gave up her position as an unpaid foreign policy adviser to Obama after calling Clinton a "monster." Geraldine Ferraro, who was the party's vice presidential nominee in 1984, stepped down from Clinton's finance committee after she said Obama would not have made it this far if he were white

Nú er mál að linni og tekist verði aðeins snyrtilegra á í þeim prófkjörum sem eftir eru.

Gettu betur úrslitin

Svo er málum farið að ég held með MR í kvöld og reyndar oftast í Gettu betur hversu ótrúlegt sem það kann nú að teljast.

Og af hverju skildi það nú vera? Þetta á sér auðvitað sögu eins og svo margt annað en hún er frásegjanleg í stuttu máli.

Fyrir mörgum árum var ég nefnilega keppandi í Gettu betur, var reyndar í keppnisliði míns skóla í 3 vetur, 1992-1994. Fyrsta árið var ekkert sérstakt, fengum eina keppni og töpuðum fyrir sterku liði VMA í það skiptið.

Næsta vetur gekk okkur betur, unnum okkur inn í 8-liða úrslit og mættum þar MR og fór sú keppni fram í ráðhúsinu í Reykjavík. Man ekki við hverja við kepptum í fyrstu keppni vetrarins en næsta keppni, sem var um það að komast í 8-liða úrslitin var á móti ME. Æsispennandi keppni með mikilli dramatík þar sem bráðabani skar úr um úrslit eftir sambandsleysi milli spyrils/dómara við báða keppnisstaði og í besta falli næstum því svindls hjá andstæðingunum. Það væri gaman að heyra þessa keppni aftur.

Keppnin við MR var þvílík upplifun, ákaflega gott heimatilbúið skemmtiatriði af okkar hálfu og vel þjálfað lið sem mætti á staðinn. Við göntuðumst með að liðið sem ynni þessa viðureign yrði meistari þess árs og sú varð síðan auðvitað raunin.

En það sem uppúr stóð voru almennilegheit, virðing og móttökur andstæðinga okkar, þ.e.a.s. þeirra þriggja sem kepptu fyrir MR og þá sérstaklega Ólafs Jóhannesarsonar. Við áttum ágæta stund fyrir keppni meðan verið var að gera allt klárt í upptöku og síðan einnig eftir keppni. Þetta hefur mér alla tíð síðan verið ógleymanlegt sem og auðvitað góð vinabönd okkar þriggja sem kepptum saman þennan veturinn þó einn okkar sé genginn sinn veg.

Við féllum fyrir MR þennan dag en einhverra hluta vegna hef ég alltaf taugar til þess skóla í Gettu betur síðan. Auðvitað töpuðum við bara á óheppni. Í þá daga voru hraðaspurningarnar nefnilega þannig að það voru tvö sett af þeim. Við lentum í því að fá seinna settið og sátum undir fyrra settinu og svöruðum í hljóði engu færri spurningum en MR en síðara settið var okkur mun erfiðara. Því fór sem fór en gaman var þetta.

Næsta vetur á eftir komumst við aftur í 8-liða úrslitin en töpuðum þar fyrir ML sem var frekar sárt man ég, mun sárara en árið á undan. En svo lauk afskiptum mínum af Gettu betur þegar ég þjálfaði lið einn vetur (95-96 minnir mig) og það var einmitt lið ML. Það fór í 8-liða úrslitin en tapaði þar á ævintýralegan hátt í blálokin.

8-liða úrslit eru mín óheppni greinilega.

Eins dauði er annars brauð

Nú þegar ríkisstjóri New York, Eliot Spitzer hefur sagt af sér vegna sinna mála eins og vel hefur verið greint frá í fréttum síðustu daga tekur auðvitað annar við.

Spitzer hættir á mánudaginn og þá tekur David Paterson við en hann er fyrsti blökkumaðurinn til að gegna starfi ríkisstjóra New York. En það er meira nýtt við Paterson. Hann er fyrsti ríkisstjóri Bandaríkjanna sem er blindur (löglega blindur).

Og hann fær hlýjar móttökur í nýja starfinu. Þetta hafði forystumaður Repúblikana að segja:

We're excited about the potential of our new governor

Það held ég.

Alltaf sér maður eitthvað nýtt

Í prófkjörinu í Texas á dögunum sá ég eitthvað sem ég hef ekki séð áður í þessum forkosningum að minnsta kosti.

Í Coryell sýslu hlutu Clinton og Obama jafn mörg atkvæði eða 2434 hvort þeirra. Það sama var síðan uppi á teningnum hjá Repúblikönum í Stephens sýslu þar sem McCain og Huckabee fengu báðir 241 atkvæði.

Það eru stundum svona fánýtir og einskis verðir hlutir sem maður getur skemmt sér yfir.

Annars er enn verið að ganga frá úrslitunum í Texas, það er að segja í forvalshluta (caucus) þeirra en ekki er búist við þeim fyrr en eftir tvær vikur. Þá ræðst endanlega hvernig þeim 67 kjörmönnum sem bundnir voru við þann hluta verður úthlutað á milli Clinton og Obama.

Annars er ég langt kominn með að reikna út kjörmannafjölda þeirra miðað við ákveðnar forsendur í næstu prófkjörum og er helst á því að verði kosið aftur í Florida og Michigan muni Obama ná tilskyldum fjölda kjörmanna til að hljóta útnefninguna.

Obama vinnur prófkjörið í Mississippi

Það fór eins og maður átti von á að Obama vinnur prófkjörið í Mississippi. Þegar kjörstöðum var lokað var hann strax lýstur sigurvegari í fréttamiðlum vestan hafs og líklega verður sigurinn eitthvað í kringum 20% hjá honum.

Þessi sigur ætti að gefa honum í kringum 20 kjörmenn og Clinton þá rúmlega 10 en í raun breytir það ekki svo ýkja miklu því frambjóðendurnir eru strax farnir að líta til Pennsylvaniu þar sem kosið verður í apríl eða eftir um það bil sex vikur. Þar hefur Clinton gott forskot samkvæmt skoðanakönnunum en það á líklega eitthvað eftir að breytast fram að kjördegi.

Svo er auðvitað mjög líklegt að einhver hreyfing komist á málefni Florida og Michigan þessar vikur sem frí er frá prófkjörunum.

Uppfært, Úrslit :

Obama 61% atkvæða - 21 kjörmaður

Clinton 37% atkvæða - 12 kjörmenn

Prófkjör í Mississippi og kjörmannahugleiðingar

Það er enn eitt prófkjörið í dag en nú er það Mississippi sem er undir með eina 33 kjörmenn í boði hjá Demókrötum. Það eru ákaflega góðar líkur á því að Obama vinni frekar stórt í dag þar sem hann á góðan stuðning vísan hjá svörtum kjósendum og þeir verða líklega um 50% þátttakenda í prófkjörinu í dag. Obama sigraði síðan í Wyoming á laugardaginn, frekar stórt meira að segja eða nærri því 60-40. Það góða sem Clinton tók útúr því var tiltölulega jöfn skipting kjörmanna eða 7-5 Obama í vil.

Annars er það athyglisvert að samkvæmt RCP að í prófkjörunum í Texas, Ohio, Rhode Island og Vermont í síðustu viku náði Clinton 10 fleiri kjörmönnum en Obama. Það voru nú ekki fleiri sem hún náði og á dögunum fram að forvalinu í Wyoming náði Obama þeim til baka í sjálfkjörnu kjörmönnunum.

En aðeins að kjörmannafjölda hvors frambjóðanda. Obama er með 1589 en Clinton 1470 fyrir prófkjörið í dag samkvæmt RCP. Obama þarf því 436 kjörmenn til viðbótar til að hljóta útnefningu flokksins en Clinton 555 en mér telst til að 599 kjörmenn séu í boði í þeim prófkjörum sem eftir eru (og síðan þeir sjálfkjörnu sem ekki hafa stutt annað hvort þeirra opinberlega fram að þessu). Þetta þýðir að eigi Obama að hljóta útnefninguna þarf hann að fá um 73% þeirra kjörmanna sem eftir eru en Clinton um 93% þeirra. Það er auðvelt að sjá að þetta getur hvorugt þeirra afrekað. Auðvitað skekkir það myndina aðeins að það eru alltaf að detta inn hjá öðru hvoru þeirra stuðningur sjálfkjörnu fulltrúanna og þar með lækkar hlutfallið sem hvort þeirra þarf af kjörmönnum sem í boði eru í prófkjörunum.

Og síðan eru það Flórida og Michigan. Það eru flestir orðnir heitir fyrir því að kjósa hreinlega aftur í þessum ríkjum, vandamálið er að enginn vill borga fyrir það. Það nýjasta í þeim efnum er að hafa póstkosningu, sem í sjálfu sér gæti alveg virkað held ég.

En þar með eru komnir fleiri kjörmenn í spilið eða 366 (eitthvað um það bil) í viðbót og þar með lækkar hlutfallið sem Obama eða Clinton þurfa af kjörmönnum í boði. Mér sýnist að það hjálpi Obama meira en Clinton þó svo að Clinton sé líklega sterkari í báðum þessum ríkjum heldur en Obama. Ég held meira að segja að það muni koma til með að færa honum útnefninguna, verði kosið aftur í þessum tveimur ríkjum með upprunalegan kjörmannafjölda í boði. Með þær kosningareglur sem í gangi eru fær Obama nefnilega alltaf góðan skerf af kjörmönnum þó svo að hann tapi prófkjörunum.

En við skulum sjá til.