Bara eitt í þessu tilefni

Ég er hlynntur því að þjóðaratkvæðagreiðslur eigi sér stað í vissum tilvikum en ekki í of mörgum málum. Ef slíkt yrði uppi á teningnum held ég að kosningarétturinn geti rýrst um of. Mér finnst varpa ágætu ljósi á þetta atriði kaflinn um beint lýðræði í bók Gunnars Helga Kristinssonar, Íslenska stjórnkerfið (bls. 27, annars er bókin í heild sinni góð lesning).

Annars dettur manni í hug að mikilvægustu lögin sem samþykkt eru á hverju þingi séu fjárlögin og ætti þá ekki að hafa þjóðaratkvæðagreiðslu um þau hverju sinni. Heldur yrði útfærsla þess flókin er maður hræddur um.

Þetta er fín lína og um að gera að ræða það af alvöru og án fordóma en þá þarf líka að taka alla anga þess inn í þá umræðu.

Hvenær á þjóðin að kjósa?

Og Einstein hafði rétt fyrir sér

Það kemur kannski ekki á óvart að Einstein hafi haft rétt fyrir sér eins og sagt er frá hér á vísindavef BBC. Það hefur kannski enginn gaman af vísindum lengur.

Ekki farið varhluta af því

Alveg hefur maður orðið var við þessa snjókomu í nótt og dag. Það hefur snjóað ótrúlega mikið á ekki lengri tíma, eiginlega allt á kafi.

Svo var maður það bjartsýnn í gær að sumardekkin fóru undir. Þá var auðvitað talað um það á verkstæðinu að ég væri sá sem ætti að setja nagladekkin undir á vorin og sumardekkin undir á haustin til að redda veðrinu.

En þrátt fyrir snjóinn er veðrið milt og gott.

Rigning, slydda og snjókoma á landinu í dag

Einn léttur

Hér kemur einn léttur í tilefni snjóþyngslanna í dag. 

Á landsfundi Samfylkingarinnar á dögunum heyrðist hátt og skýrt frá einum frambjóðandanum af sviðinu þegar þeir voru kallaðir þar upp: Samfylkingin er svarið. Þá mun hafa heyrst í Jóni Baldvin sem staddur var nærri sviðinu: ef Samfylkingin er svarið þá hefur spurningin verið út í hött.

Þessi er eins og Árna Johnsen brandarinn tekinn úr gulu bókinni og uppfærður til raunveruleika dagsins.

Víðar en á Íslandi

Það er víðar en á Íslandi sem menn reyna að sameina vinstri menn og einfalda stjórnmálin. Nú á að láta reyna á það á Ítalíu.

Áhyggjur landsbyggðarinnar

Ég held að landsbyggðarfólk og aðrir sem vilja byggja upp búsetu á landsbyggðinni, á hvaða hátt sem er, þurfi að hafa meiri áhyggjur af eftirfarandi viðhorfum heldur en tilfærslu flugvallarins um nokkra kílómetra innan höfuðborgarinnar.

Íslendingar eiga að búa á höfuðborgarsvæðinu. Það er ódýrast og hagkvæmast. Við þurfum ekki lengur verstöðvar við ströndina. Fiskurinn er verkaður um borð eða settur á fiskmarkaði við Faxaflóa. Það er dauðadómur yfir stofnun að senda hana út á land, samanber Byggðastofnun á Króknum og Landmælingar á Akranesi. Ekkert vit er í að hafa háskóla úti um allar trissur. Þar myndast ekki akademískt andrúmsloft. Enda helzt fólk ekki við í plássum án þess að væla um skort á álveri, olíuhreinsistöð, háskóla og svo framvegis, allt á kostnað ríkisins. Ódýrara er að flytja fólkið suður. Hér er nóg pláss fyrir alla.

Þetta innslag er tekið af vefnum http://jonas.is/ og sjálfsagt flestir búnir að sjá þetta. Þarna er í raun slegið á allt sem menn vilja viðhafa til uppbyggingar og styrkingar búsetu í landinu öllu og öllum stefnt á suðvestur hornið. Hugnast mér ekki og getur ekki verið heilli þjóð hollt.

Ég hef áhuga

Annars held ég að dallurinn sé í stærsta lagi fyrir tjörnina hérna og kannski ekki mikil eftirspurn eftir flutningum á henni. Hugsanlega gæti maður breytt Muuga greyinu í túristafley.

Annars væri nú ágætt ef hægt væri að koma skipinu í þokkalegt verð svona úr því sem komið er. 

Áhugi á Wilson Muuga

Þetta er ég ánægður með

Mér líst vel á það að fylgja fordæmi Norðmanna varðandi Palestínu eins og Valgerður Sverrisdóttir hefur nú boðað. Eðlileg samskipti við Palestínu hljóta að vera einn hornsteinninn í lausn vandamála á þessu svæði.

Svei mér þá

Ég lagði það á mig að horfa á norræna þáttin í gærkvöldi í dagskrárlok til að sjá endanlegu útgáfu lagsins. Svei mér þá ef það er ekki bara betra með enska textann en í upphafi fannst mér textinn vera að draga lagið niður.

Það hefur í það minnsta ekki versnað.

Eiríkur Hauksson tekur lagið og veitir eiginhandaráritanir

Dagurinn í myndum

Í boði BBC

Skemmtileg og aðeins öðruvísi sýn á veröldina.